Ný íslensk ópera í Iðnó um helgina

Ný íslensk ópera í Iðnó um helgina

Föstudaginn 6. apríl frumsýnir Menntaskóli í tónlist nýja óperu eftir Þórunni Guðmundsdóttur. Verkið heitir „Fjóla, stjúpa, puntstrá og prins“. Það gerist í tónlistarskóla sem er í miklum kröggum, skólastjórinn er þunglyndur og hefur misst trúna á tónlistina. Til þess að bæta ástandið ákveða nemendur að setja upp ævintýraóperu um ráðvilltan prins sem fær það verkefni að velja sér konu á miklum dansleik. Þangað mæta áfjáðar stúlkur og grimmar stjúpur auk veiðimanns og úr verður mikil flækja. Inn í þetta allt saman fléttast svo ástamál nemendanna í skólanum.

Tuttugu söngvarar koma fram í sýningunni auk níu manna hljómsveitar undir stjórn Hrafnkels Orra Egilssonar. Leikstjóri er Þórunn Guðmundsdóttir. Þetta er sjöunda óperan sem Þórunn semur og hafa þær allar verið frumfluttar af Tónlistarskólanum í Reykjavík.

Sýningar verða eingöngu nú um helgina, frá föstudegi til sunnudags. Sýnt er í Iðnó og hefjast sýningar kl. 20.00 öll kvöldin.

Meðfylgjandi mynd sýnir prinsinn (Gunnar Thor Örnólfsson) rekja raunir sínar fyrir hirðinni.

0 Slökkt á athugasemdum við Ný íslensk ópera í Iðnó um helgina 271 03 apríl, 2018 Allar fréttir, Vikupóstur apríl 3, 2018

Áskrift að Vikupósti

Karfa