Author: lensherra

Föstudaginn 24. Mars frumsýnir LA stórsýningu vetrarins, söngleikinn ástsæla, Litla hryllingsbúðin. Verkið sló í gegn snemma á níunda áratugnum þegar það var frumsýnt og hefur notið mikilla vinsælda síðan. Í aðalhlutverkum eru Guðjón Davíð Karlsson, Vigdís Hrefna Pálsdóttir og Andrea Gylfadóttir. Leikstjóri er Magnús Geir Þórðarson. Litla hryllingsbúðin hefur verið sýnd í leikhúsum um allan heim. Enda er sagan krassandi, persónurnar heillandi, tónlistin grípandi og húmorinn allsráðandi. Þetta er í þriðja skipti sem verkið er sett upp í atvinnuleikhúsi á Íslandi en Hitt leikhúsið setti verkið upp í Íslensku óperunni árið 1984 og Borgarleikhúsið árið 1998. Kvikmynd var gerð upp úr söngleiknum árið 1988 og skartaði hún m.a. Steve Martin í hlutverki tannlæknisins. 

Baldur eyðir fábrotnum dögunum í blómabúðinni hans Markúsar. Hann lætur sig dreyma um ástir Auðar sem er vinnur með honum í búðinni. Dag einn, rétt fyrir sólsetur uppgötvar Baldur undarlega plöntu sem hann nefnir Auði II í höfuðið á sinni heittelskuðu. Áður en langt um líður kemur í ljós að plantan hefur undarlega eiginleika og gríðalega matarlyst. Og hún vex og vex. Plantan vekur óskipta athygli og viðskiptin blómstra sem aldrei fyrr. Inn í söguna blandast svo kærasti Auðar, tannlæknir með kvalalosta, og atburðarrásin tekur óvænta stefnu… Græðgin er eitt meginstef verksins og ljóst að hinir saklausu geta legið vel við höggi þegar freistingar eru annars vegar. Geisladiskur með tónlistinni kemur í verslanir á morgun, mánudaginn...

Æfingar standa nú yfir á leikritinu Þrek og tár eftir Ólaf Hauk Símonarson hjá leikfélagi Hveragerðis.  Ólafur Jens Sigurðsson leikstýrir verkinu og er það í annað sinn sem leikfélagið fær hann til starfa.  Margir leikarar eru í sýningunni eða 10 karlar og 7 konur og tók nokkurn tíma fyrir leikfélagið að lokka til sín karlleikara. Leikritið Þrek og Tár er flestum kunnugt og hafa mörg leikfélög sett það upp og nutum við góðs af því. t.d. var leikfélagið á Sauðárkróki  hjálplegt og lét í té nótur af tónlistinni og kann Leikfélag Hveragerðis því bestu þakkir fyrir það. Stefnt er að frumsýningu laugardaginn 1. apríl nk....

Opinn samlestur í Borgarleikhúsinu.   Nú eru að hefjast æfingar í Borgarleikhúsinu á óborganlegum farsa sem hefur fengið nafnið Viltu finna milljón? Gamanleikurinn verður frumsýndur á Nýja sviði Borgarleikhússins í maí. Landslið grínara situr nú og les sjóðheitt, nýútprentað handritið í þýðingu Gísla Rúnars Jónssonar. Leikarar eru: Eggert Þorleifsson, Helga Braga Jónsdóttir, Marta Nordal, Þórhallur Sigurðsson (Laddi), Bergur Þór Ingólfsson, Gunnar Hansson og Theodór Júlíusson. Leikstóri er Þór Tulinius. Verkið heitir á frummálinu Funny money og er eftir Ray Cooney, verkið hefur farið sigurför um Evrópu og Ameríku síðan það var frumsýnt í London 1994.  Ray Cooney er að góðu kunnur íslenskum áhorfendum en gleðileikurinn “Með vífið í lúkunum”  í leikstjórn Þórs Tulinius, var sýnt tvö leikár í röð fyrir fullu húsi í Borgarleikhúsinu. Opin samlestur á Viltu finna milljón? verður haldinn mánudaginn 20.mars á Nýja sviði Borgarleikhússins  kl. 12:30 og eru allir áhugasamir velkomnir. Við þetta tækifæri mun Guðjón Pedersen leikhússtjóri kynna væntanlega hláturhátíð sem verður í Borgareikhúsinu í maí. Aðgangur...

Leikfélag Vestmannaeyja frumsýnir laugardaginn 18. mars leikritið Nunnulíf sem byggt er á kvikmyndinni Sister Act. Leikstjóri er Laufey Brá Jónsdóttir, kórstjóri er Helga Jónsdóttir. Sýnt er í Bæjarleikhúsinu. Sister Act hefur aldrei verið sett upp á leiksviði og var undirbúningsvinnan því þó nokkur.  Ásamt leikstjórastöðu tók Laufey Brá að sér handritsgerð og galdraði hún fram handrit með guðs hjálp á ótrúlega stuttum tíma. Útkoman er Nunnulíf, stórskemmtilegt leikrit sem fléttar saman lífi reglusystra og hinu harða lífi undirheimanna. Leikritið fjallar í stuttu máli um söngkonu á næturklúbbi, Díönnu Díor, sem verður vitni að hræðilegum glæp.  Hún leitar aðstoðar lögreglu sem ákveður að fela hana í klaustri á meðan rannsókn á málinu fer fram.  Mikil togstreita á sér stað hjá söngkonunni og lífið í klaustrinu tekur óvænta stefnu.   Leikfélag Vestmannaeyja og Framhaldsskólinn í Vestmannaeyjum standa saman að þessari uppsetningu en svona samstarf hefur verið ríkjandi undanfarin ár.  Stór hluti leikara eru nemendur í skólanum og er þessi vinna metin til eininga. Æfingar hafa staðið yfir í um 6 vikur og er Helga Jónsdóttir kórstjóri hópsins. Sýningar fara fram í Bæjarleikhúsinu. Frumsýning laugardaginn 18. mars kl. 20:00 2. sýning föstudaginn 24. mars kl. 20:30 3. sýning laugardaginn 25. mars kl. 20:00 Miðasala í síma...

Leikfélag Keflavíkur í samvinnu við Vox Arena, leikfélag fjölbrautaskóla Suðurnesja, vinna nú saman að nýju verkefni.  Verkefnið, sem hlotið hefur nafnið: "KEFLAVÍK, ÍSLAND, ALHEIMURINN eða MAMMA ÞÍN" verður frumsýnt í Frumleikhúsinu föstudaginn 17. mars, kl 20:00.  Leikritið er unnið á all sérstakan hátt en það er leikhópurinn sjálfur sem býr til verkið.  Að sögn Alexöndru, formanns Vox Arena, skoðar leikritið lífið í Keflavík, á Suðurnesjum og lífið almennt, á ansi sérstæðan hátt. Kjarni efnisins er unnin upp úr viðtölum við fólk, bæði af Suðurnesjum og annars staðar frá en hópurinn tók sér leyfi til að snúa út úr öllum upplýsingum sem það hafði og jafnvel snúa staðreyndunum á hvolf ef svo bar undir. Tónlistin í verkinu er einnig öll frumsamin og umræður um útgáfu á geisladiski með lögum úr verkinu standa nú yfir. Frumsýning er á föstudaginn 17.mars kl. 20 og 2. sýning sunnudaginn 19. mars kl. 20. Upplýsingar um sýningartíma og miðapantanir eru í síma 421-2540. Einnig er hægt að fylgjast með á vef leikfélagsins...