Vel heppnað námskeið á Sauðárkróki

Vel heppnað námskeið á Sauðárkróki

Dagana 7. – 11. mars stóð Leikfélag Sauðárkróks fyrir leiklistarnámskeiði í húsnæði sínu Leikborg. Leiðbeinandi var Jakob S. Jónsson sem mun leikstýra Sæluvikuverkefni LS þetta árið, Svefnlausa brúðgumanum. Alls tóku 18 manns þátt í  námskeiðinu, allir með einhverja leikreynslu en mismikla þó. Tíðindamaður heimsíðu leikfélagsins (www.skagafjordur.net/LS) leit við á námskeiðinu fyrsta kvöldið, spurði þátttakendur nokkurra spurninga og varð nokkurs vísari um út á hvað leiklistarnámskeið gengur.

Það sem dró fólkið á námskeiðið virtist aðallega vera það að menn langaði að lyfta sér upp, kynnast sjálfum sér og sinni getu, teygja aðeins á þægindasviðinu, víkka sjóndeildarhringinn og nýta sér þetta allt við að leika betur, nú eða bara í daglega lífinu. Til að ná þessu fram voru gerðar ýmiskonar samvinnu- og hópæfingar sem virtust mjög undarlegar við fyrstu sýn, en höfðu allar ákveðinn tilgang. Æfingin að ganga um í hóp og stoppa þegar einhver annar stoppar æfir tilfinningu fyrir umhverfinu, meðleikendum og hreyfingum þeirra; strengjabrúðuleikur gengur út á að skilja ábyrgð stjórnandans á þeim sem hann stýrir og einbeitingu og öryggi þess sem lætur að stjórn; að gefa og þiggja bros sem stækkar alltaf pínulítið virkar svo bara fyndið og skemmtilegt, en lumar örugglega á einhverjum félagslegum samskiptapælingum sem tíðindamaður getur ekki alveg fest fingur á.

Jakob stýrði hópnum í gegnum æfingarnar af skemmtilegri lipurð, hópurinn virtist alveg með á nótunum og fylgdi honum einbeittur eftir, sama hversu undarlegar pælingar og æfingar voru í gangi. Jakob tók líka fram í lok æfingar að þetta væri samheldinn hópur og fyrsta kvöldið á leiklistarnámskeiði gengi nú ekki alltaf svona smurt.

Hópurinn var að lokum sammála um að það sem þau hefðu í raun verið að gera allt kvöldið væri að kynnast, læra að tengjast fólki á nýjan og öðruvísi hátt, vinna með öðrum (sem reyndist sumum auðveldara en þeir héldu), en aðalatriðið hefði þó verið að skemmta sér og leika sér saman!

g&b

{mos_fb_discuss:3}

0 Slökkt á athugasemdum við Vel heppnað námskeið á Sauðárkróki 259 15 mars, 2011 Allar fréttir mars 15, 2011

Áskrift að Vikupósti

Karfa