Gullregn frumsýnt á Nýja sviðinu

Gullregn frumsýnt á Nýja sviðinu

Gullregn Ragnars Bragasonar verður frumsýnt á Nýja sviði Borgarleikhússins 1. nóvember næstkomandi. Gullregn er mannlegt og broslegt en um leið harmrænt verk um fólk sem við þekkjum öll. Hér birtast Íslendingar nútímans með öllum sínum kostum og göllum. Hrár og ómengaður samtími. Leikstjórn er í höndum hins margreynda kvikmyndagerðmanns Ragnars Bragasonar en þetta er frumraun hans í leikhúsi. Mugison semur tónlist, Hálfdan Petersen hannar leikmynd og Helga Rós V. Hannam búninga. Þegar er uppselt á 23 sýningar af verkinu.

Indíana Jónsdóttir býr í blokk í Fellahverfinu umkringd fólki af erlendum uppruna sem hún fyrirlítur. Indíana lifir á bótum en er fullkomlega heilbrigð. Hún kann á kerfið – er svokallaður kerfisfræðingur. Í litla garðskikanum fyrir aftan íbúðina hefur hún ræktað tré sem er hennar stolt og yndi – Gullregn. Þegar fulltrúi Umhverfisráðuneytisins bankar upp á og tilkynnir að uppræta skuli allar gróðurtegundir sem ekki voru til staðar á Íslandi fyrir árið 1900 snýst heimur Indíönu á hvolf með baráttu upp á líf og dauða.

Ragnar Bragason er í fremsta flokki íslenskra kvikmyndagerðarmanna en meðal verka hans eru Börn, Foreldrar, Næturvaktin, Dagvaktin, Fangavaktin og Bjarnfreðarson. Aðferðin við sköpun Gullregns er sú sama og Ragnar hefur notað í kvikmyndum og leiknu sjónvarpsefni síðasta áratuginn. Persónur eru þróaðar í samvinnu við hvern og einn leikara í tiltölulega langan tíma. Það skemmir svo ekki fyrir að þjóðargersemin Mugison semur tónlistina við verkið og er þetta frumraun þeirra beggja í íslensku leikhúsi.

Leikarar í verkinu eru þau Sigrún Edda Björnsdóttir, Hallgrímur Ólafsson, Halldóra Geirharðsdóttir, Brynhildur Guðjónsdóttir, Halldór Gylfason, Hanna Maja Karlsdóttir og Jóhanna Axelsdóttir.

0 Slökkt á athugasemdum við Gullregn frumsýnt á Nýja sviðinu 252 29 október, 2012 Allar fréttir október 29, 2012

Áskrift að Vikupósti

Karfa