| Hjálp !
Leikhús, komdu mér til hjálpar
Ég sef. Vektu mig
Ég er týndur í myrkrinu, leiddu mig, í það minnsta að kertaloga
Ég er löt, láttu mig skammast mín
Ég er þreyttur, reistu mig við
Mér stendur á sama, lemdu mig
Mér stendur enn á sama, hjólaðu í mig
Ég er hræddur, hughreystu mig
Ég er fáfróð, menntaðu mig
Ég er skepna, gerðu mig að manneskju
Ég er tilgerðarlegur, komdu mér til að veltast úr hlátri
Ég er kaldhæðin, sláðu mig út af laginu
Ég er heimskur, breyttu mér
Ég er illgjörn, refsaðu mér
Ég er ráðríkur og grimmur, berstu gegn mér
Ég er smámunasöm, gerðu grín að mér
Ég er ókurteis, viltu ala mig upp
Ég er mállaus, leystu mig
Mig dreymir ekki lengur, segðu mér að ég sé aumingi eða fáviti
Ég hef gleymt, helltu Minningunni yfir mig
Mér finnst ég gömul og þreytt, láttu Barndóminn vakna
Ég er þungur, gefðu mér Tónlistina
Ég er leið, náðu í Gleðina
Ég er heyrnarlaus, láttu Þjáninguna öskra í óveðrinu
Ég er stressaður, láttu Viskuna vitja mín
Ég er veik, kveiktu Vináttu
Ég er blindur, kallaðu til öll Ljósin
Ég er undirgefin Ljótleikanum, kynntu Fegurðina allsráðandi til sögunnar
Hatrið hefur náð tökum á mér, láttu alla krafta Ástarinnar tala til mín
Athugið: Það er viljandi sem karlkyn og kvenkyn er notað á víxl. Ekki leiðrétta það !
Guðrún Vilmundardóttir þýddi |
 |
