STARFSTÍMI SKÓLANS ER 20. – 28. JÚNÍ 2026 AÐ REYKJASKÓLA Í HRÚTAFIRÐI.
— Smella hér til að sækja um!* —
(*Opnað fyrir skráningu 1. mars kl. 12.00)
3. apríl fá umsækjendur svar við umsókn. ATH! Staðfestingargjald að upphæð 40.000 kr. þarf að vera greitt til að umsókn sé samþykkt!
KVEÐJA FRÁ SKÓLANEFND
Kæru leiklistarvinir!
Hlökkum til að sjá ykkur – með bestu kveðju,
Elli, Jónheiður, Hrefna, Gísli Björn og Guðfinna
LEIKLIST I
Kennari: Ágústa Skúladóttir
Námskeiðsgjald: 116.000 kr.
Námskeiðið er grunnnámskeið fyrir leikara og þeir ganga fyrir sem ekki hafa sótt Leiklist I. Næsta sumar verður haldið framhaldsnámskeið sem byggir á þessu námskeiði.
Á námskeiðinu verður farið í grunnatriði í list leikarans. Lögð verður áhersla á að leysa úr viðjum frumorku, einlægni og sköpunargleði, samband leikarans við sjálfan sig, meðleikara og áhorfendur. Unnið verður með líkamsbeitingu og texta og einnig verður kíkt á mismunandi leikaðferðir eða leikstíla eins og t.d. gleðileik, dramatík, Bouffon og melódrama..
Nemendur munu takast á við agann sem þarf að vera til staðar í stórum, stílfærðum hópsenum en einnig verður farið í spuna í smærri hópum, tvíleik og stuttum einleikjum. Mikilvægi liðsheildar hóps verður ríkjandi þáttur námskeiðsins því þegar hlustun og leikgleði ráða ríkjum getur allt gerst!
Mottó námskeiðsins: Einn fyrir alla – allir fyrir einn!!
Ágústa Skúladóttir er einn reyndasti leikstjóri landsins. Leikstjórnarverkefni hennar með atvinnu- og áhugafólki eru orðin um það bil 70 talsins á undanförnum 20 árum og spanna allt frá litlum brúðusýningum upp í stórar óperur, frá einleikjum til grímusýninga án orða og mannmargra söngleikja. Sem leikstjóri hefur hún einnig unnið fjölda leiksmiðjuverka, þar sem sýning verður til úr grunnhugmynd í samvinnu leikhóps og listrænna stjórnenda. Í því sambandi má nefna Grimms með Leikfélagi Kópavogs, Klaufa og kóngsdætur í Þjóðleikhúsinu, Ævintýri Munchásens í Gaflaraleikhúsinu og Gosa – ævintýri spýtustráks í Borgarleikhúsinu. Á síðustu árum hefur Ágústa sett upp sýningar eins og Kardemommubæinn í Þjóðleikhúsinu, Njálu á hundavaði í Borgarleikhúsi, Bíddu bara í Gaflaraleikhúsinu, heilgrímusýninguna Hetju! og kveðjusýningu Karls Ágústs Fíflið Tjarnarbíói. Hún er einnig leikstjóri uppistandssýningarinnar Madame Tourette og Hvað sem þið viljið eftir Shakespeare í Þjóðleikhúsinu, Gilitrutt með leikhópnum Lottu, Hollvættir á heiðinni sem sýnt var í Sláturhúsinu á Egilsstöðum og óperuna Hliðarspor í Gamla bíói.
LEIKRITUN – Sérnámskeið
Kennari: Karl Ágúst Úlfsson
Námskeiðsgjald: 116.000 kr.
Þeir sem hafa lokið Leikritun I og II hafa forgang á þetta námskeið. Sérnámskeið í leikritun er ætlað nemendum sem tekið hafa námskeið 1 og 2, eða hafa sambærilega reynslu sem leikskáld – hafa skrifað stór leikrit frá upphafi til enda. Þeir umsækjendur ganga fyrir sem sótt hafa Leikritun I og II í Leiklistarskóla BÍL. Á námskeiðinu er ekki ætlunin að vinna að löngum verkum, heldur munum við skoða sérstaklega uppbyggingu, hvörf, framvindu sögunnar, persónusköpun og fleira. Við munum einnig vinna með mismunandi stíl og gera æfingar sem beinast að ólíkum flokkum leikrita, til dæmis með því að skoða dramatík, farsa, harmleiki, gleðileiki, fáránleika og fleira. Hópurinn mun vinna saman á köflum, en einnig munu tveir og tveir vinna að stökum verkefnum, bæði sjálfstætt og í samvinnu við kennarann.
Karl Ágúst Úlfsson hefur starfað sem leikari, leikstjóri, þýðandi og höfundur í ríflega fjörutíu ár. Hann hefur starfað við Þjóðleikhúsið, Leikfélag Reykjavíkur, Leikfélag Akureyrar og fjölda frjálsra leikhópa í gegnum tíðina. Sem leikari er hann etv. þekktastur fyrir leik sinn í Lífmyndunum og í þeim óteljandi þáttum sem Spaugstofan sendi út á RÚV og Stöð 2, en hann var einnig handritshöfundur þeirra þátta. Sem þýðandi hefur hann þýtt vel yfir sextíu leikrit eftir höfunda eins og Shakespeare, Ibsen, John Ford, Tennesee Williams, Mrozek, Fassbinder og fleiri. Einnig söngleiki eins og Galdrakarlinn í Oz, Sögu úr vesturbænum, Rent, Kabarett og Billy Elliot. Uppsett leikverk eftir Karl eru á milli tuttugu og þrjátíu, skrifuð fyrir svið, útvarp og sjónvarp en hann hefur einnig ritað kvikmyndahandrit. Af verkum hans má nefna til dæmis Í hvítu myrkri, Fögru veröld, Örfá sæti laus, Gosa, Sól og Mána, Gulleyjuna, Ó þessi þjóð, Harrý og Heimi, Í skugga Sveins. Gallsteina afa Gissa og Fíflið.
Improv námskeið
Kennari: Gríma Kristjánsdóttir
Námskeiðsgjald: 116.000 kr.
Sérnámskeið í leiklist, ætlað þeim sem sótt hafa Leiklist I og II og eða sambærileg grunnnámskeið eða hafa umtalsverða reynslu af sviðsleik. Þeir sem hafa tekið leiklist I og II hafa forgang á sérnámskeið.
Spuni er auðvitað bara í grunninn að gera eitthvað sem ekki er búið að ákveða eða æfa áður og hægt að nota hann á margvíslegan hann. Á þessu námskeiði verður kenndur grínspuni, betur þekktur undir enska hugtakinu ‚Improv‘. Fyrst verður farið í grunnreglur spunans, hvernig hægt er að sleppa tökunum, nota það sem kemur fyrst upp í hugann og leyfa spunanum að halda áfram í samvinnu allra á sviðinu. Í framhaldinu verður improv formið kynnt inn og hvernig er hægt að byggja upp senur með ákveðnum aðferðum þannig að þær verði fyndnar og skemmtilegar. Hugtakið „Leikurinn“ (e. The game) og hvernig við finnum öryggi í honum er í brennidepli á námskeiðinu, hvernig hægt er að finna saman hvað er hið fyndna (Leikurinn) í senunni sem verður til og halda svo áfram að byggja senuna. Síðan verða kynnt mismunandi spunaform sem hægt er að byggja á þegar sýndar eru spunasýningar og með þeim er byggt enn meira ofan á formið, hvernig við færum sömu grínhugmyndina á milli mismunandi sena.
Grínspuni í sjálfu sér er mjög skemmtilegt form sem er skemmtilegt að læra og sýna á sviði. En spuni yfir höfuð getur líka nýst okkur vel í leiklistinni með ýmsum hætti og ætti hver sem er að fara af þessu námskeiði með nýtileg verkfæri í farteskinu.
Þetta er í annað sinn sem Gríma kennir við skólann.
Complete Vocal
Kennari: Þórhildur Örvarsdóttir
Námskeiðsgjald: 116.000 kr.
Á þessu námskeiði köfum við ofan í undraheim raddarinnar með Complete Vocal Technique (CVT). Grunnstefið er einfalt: Öll hljóð raddarinnar eru leyfileg og möguleg með réttri tækni og aðferðum. Markmiðið með námskeiðinu er að þátttakendur öðlist haldgóða þekkingu á virkni raddarinnar, auki raddlega getu og víkki út hugmyndina um hvað þín eigin rödd getur í raun og veru. Við fléttum saman þekkingu, tækni og söng á opinn og lifandi hátt:
- Fyrirlestrar – tækni og líffræði: Við skoðum hvernig röddin virkar í raun og veru. Hér svörum við spurningunum um það hvernig röddin framleiðir tón og úr hvaða hlutum hann er byggður. Farið er yfir undirstöðuatriði eins og öndun, stuðning og raddbönd. Við prófum okkur áfram með mismunandi „gíra“, raddlit og effekta.
- Masterclass – þín nálgun: Í þessum hluta námskeiðsins fá allir pláss til að vinna með sín eigin markmið. Hvort sem þú vilt mastera eitthvað sérstakt lag, ná tökum á ákveðnum þáttum í eigin rödd eða bara almennt styrkja tæknina þína þá færðu hér tækifæri til þess. Hér notum við þekkinguna úr fyrirlestrinum til að þjálfa eigin tækni. Hér verður líka tækifæri til að vinna með talaðan texta. Í masterclössunum lærum við jafnt af okkar eigin vinnu og því að fylgjast með öðrum – öll taka þátt allan tímann.
Við leggjum ríka áherslu á persónulegan stíl. Hér sköpum við öruggt rými fyrir tilraunastarfsemi og listrænt frelsi, þar sem þú færð að prófa þig áfram með þína eigin rödd undir faglegri leiðsögn.
Um kennarann
Þórhildur Örvarsdóttir er söng- og raddkennari með yfir 20 ára reynslu af raddvinnu með söngvurum og leikurum. Hún útskrifaðist frá Söngskólanum í Reykjavík 2000, stundaði nám í söng- og söngkennslu við Complete Vocal Institue, Kaupmannahöfn, 2005-2008, lauk meistaraprófi í miðaladafræðum frá háskólanum í Aberdeen 2022 auk þess sem hún stundar nú meistaranám í menntunarfræðum við Háskólann á Akureyri.
Hún hefur komið að raddþjálfun við sýningar í öllum atvinnuleikhúsum landsins og kennt við leikarabraut LHÍ. Hún hefur hún haldið fjölmörg námskeið í raddbeitingu fyrir söngvara og leikara um allt land. Þórhildur starfar nú sem kennari við Sviðslistabraut Menntaskólans á Akureyri og sem söngkennari og fagstjóri rytmískrar söngdeildar við Tónlistarskólann á Akureyri.
ALMENNAR UPPLÝSINGAR
Skráning í skólann stendur yfir frá 1. mars til og með 31. mars. Umsóknir skal fylla út á Leiklistarvefnum, www.leiklist.is. Opnað verður fyrir umsóknir 1. mars. kl. 12.00.
- Reglan Fyrstur kemur – fyrstur fær gildir við skráningar gegn greiðslu staðfestingargjalds, kr. 40.000, ef inntökuskilyrðum er fullnægt að öðru leyti. Sjá forkröfur námskeiða!
- Staðfestingargjald dregst frá endanlegu skólagjaldi. Ef velja þarf á milli umsækjenda gerir skólanefnd það á grundvelli fyrri menntunar og reynslu viðkomandi.
- Náist ekki ásættanlegur fjöldi á tiltekið námskeið fellur það niður.
- Aldurstakmark í skólann er 18 ár.
- Skólinn hefur sett sér reglur, m.a. um umgengni, reykingar og áfengisneyslu, sem nemendur samþykkja að fara eftir á starfstíma skólans.
Starfstími skólans á þessu ári er frá 20. til 28. júní. Skólasetning er laugardaginn 20. júní kl. 9.00 og hefjast námskeiðin strax þar á eftir. Nemendur eru velkomnir að Reykjaskóla kvöldið fyrir skólasetningu, frá kl. 20.00 en þá er ekki boðið upp á kvöldverð. Skólaslit eru kl. 12.00 sunnudaginn 28. júní. Viðurkenningarskjöl og merki skólans verða afhent við skólaslit.
Aðstaða í Reykjaskóla:
Svefnherbergin eru búin 2-4 rúmum og koddi og sæng fylgja en nemendur þurfa að hafa með sér lak og sængurföt. Nemendur hafi með sér handklæði og sundföt. Sundlaug og heitir pottar eru á staðnum, einnig er náttúrulaug opin öllum. Minnum sérstaklega á að taka með sér hlý föt, bendum einnig á að ekki er þvottavél til afnota fyrir nemendur, auk þess er gott að hafa með fjöltengi. Innfalið í skólagjaldi er fullt fæði, þ.e. morgunmatur, hádegismatur og kvöldmatur auk kaffiveitinga tvisvar á dag.
Haldið er lokahóf síðasta kvöldið þar sem fólk klæðir sig upp á, kveður kennarana sína og skemmtir hvert öðru með dansi og söng.
Skólagjald:
Þátttökugjald á námskeið er 116.000 kr. Skólagjaldið skal vera að fullu greitt í síðasta lagi 1. júní 2026.
Staðfestingargjald er kr. 40.000. Umsókn er þá fyrst gild að búið sé að greiða staðfestingargjald! Staðfestingargjald er óendurkræft nema gegn framvísun læknisvottorðs.
Innifalið í þátttökugjaldi er gisting, matur, kennsla og gögn.
Staðfestingargjald skal greiða fyrir
31. mars, að öðrum kosti fellur umsókn niður. Greiða skal til Bandalags íslenskra leikfélaga og skal senda tilkynningu á netfangið info@leiklist.is:
Millifærslureikningur er 334-26-5463 – Kt. 440169-0239. Takið skýrt fram ef annar en umsækjandi greiðir!
Meðlimum aðildarfélaga Bandalags íslenskra leikfélaga er bent á að félögin geta sótt um smá styrk til Bandalagsins ef þau senda nemendur í skólann. Þá styrkja mörg stéttarfélög tómstundastarf félagsmanna og fellur Leiklistarskólinn þar undir.
Kennarar skólans og starfsfólk:
Skólastýri — F. Elli Hafliðason , donellione@gmail.com
Skólastýri — Jónheiður Ísleifsdóttir, jonheidur@gmail.com
Leiklist I — Ágústa Skúladóttir, agustaskula@gmail.com
Leikritun III — Karl Ágúst Úlfsson, undur@stormerki.is
Improv — Gríma Kristjánsdóttir, grimakrist@gmail.com
Complete Vocal Technique – Þórhildur Örvarsdóttir, hilda.orvars@gmail.com
Hafið samband við Þjónustumiðstöð BÍL ef spurningar eru varðandi skólann eða annað honum tengt:
Bandalag íslenskra leikfélaga, Kleppsmýrarvegi 8, 104 Reykjavík
sími 551 6974, netfang info@leiklist.is, veffang www.leiklist.is
