Leikhópurinn Lotta á Vesturlandi

Leikhópurinn Lotta á Vesturlandi

Dagana 9. – 13. júní mun Leikhópurinn Lotta ferðast með sýninguna sína, Rauðhettu, um Vesturland. Ferðin hefst í Borgarnesi en þar er sýnt í Skallagrímsgarði, fimmtudaginn 11. júní klukkan 18:00. Um helgina verður farið á Snæfellsnesið, fyrst til Ólafsvíkur á föstudeginum en þar er sýnt í Sáinu klukkan 18:00 og á laugardeginum er sýnt annars vegar í Grundarfirði klukkan 11:00 og í Stykkishólmi í Kvennfélagsgarðinum klukkan 15:00. Frá Vesturlandi heldur hópurinn til Vestfjarða og þaðan norður í land.

Sýnt er utandyra og er því um að gera að klæða sig eftir veðri og taka með sér teppi til að sitja á og hlýja sér ef kalt er í veðri.

Verkið skirfaði Snæbjörn Ragnarsson og er það byggt á klassísku ævintýrunum um Rauðhettu og úlfinn, Hans og Grétu og Grísina þrjá. Sögurnar eru fléttaðar saman á nýstárlegan og skemmtilegan hátt svo úr verður stærðarinnar ævintýr. Snæbjörn hefur einnig samið lög fyrir verkið ásamt bróður sínum Baldri og Gunnari Ben.

Þetta er þriðja sumarið sem Leikhópurinn Lotta tekur sig til og setur upp barnasýningu. Sumarið 2007 var hið sívinsæla verk Torbjörns Egners, Dýrin í Hálsaskógi, sett á svið og í fyrra var það Galdrakarlinn í Oz í nýrri leikgerð Ármanns Guðmundssonar.

Miðaverð er óbreytt frá fyrri árum en miðinn kostar 1.500 krónur fyrir fullorðna og 1.000 krónur fyrir börn. Þetta er því ódýr fjölskylduskemmtun sem enginn má láta framhjá sér fara.

Leikhópurinn mun halda áfram að sýna í Elliðaárdalnum í sumar og er áætlað að sýna þar alla miðvikudaga í sumar klukkan 18:00. Þá ferðast hópurinn um landið með sýninguna og er áætlað að sýna á yfir 50 stöðum um allt land. Nánari upplýsingar um sýningarplan má finna á heimasíðu hópsins www.leikhopurinnlotta.is.

0 Slökkt á athugasemdum við Leikhópurinn Lotta á Vesturlandi 164 11 júní, 2009 Allar fréttir júní 11, 2009

Áskrift að Vikupósti

Karfa