Góðverkin kalla! í Hellubíói

Góðverkin kalla! í Hellubíói

Föstudaginn 1. nóvember frumsýnir Leikfélag Rangæinga gamanleikinn Góðverkin kalla í hinu fornfræga Hellubíói á Hellu. Höfundar eru Ármann Guðmundsson, Sævar Sigurgeirsson og Þorgeir Tryggvason en Ármann er jafnframt leikstjóri verksins. Hellubíó hefur nú verið gert upp er þar rekið veitingahús með ýmsa menningarstarfsemi í gamla salnum. Það er því tilvalið að gera sér glaðan dag í nóvember, borða góðan mat og sjá skemmtilega leiksýningu.

Næstu sýningar:
Fös. 1. nóv. frumsýning
Sun. 3. nóv. sýning kl. 18
Mán. 4. nóv. sýning kl. 20
Mið. 6. nóv. sýning kl. 20
Fim. 14. nóv. sýning kl. 20
Fös. 15. nóv. sýning kl. 20
Lau. 16. nóv. sýning kl. 15
Lau. 16. nóv. sýning kl. 20
Sun. 17. nóv. sýning kl. 18

Góðverkin kalla! var upphaflega skrifað fyrir Leikfélag Akureyrar og frumsýnt þar fyrir 20 árum síðan. Það hefur notið allnokkurra vinsælda hjá áhugaleikfélögum síðan og er þetta í áttunda sinn sem það er sett upp hjá leikfélagi úr röðum Bandalags íslenskra leikfélaga.

Verkið fjallar á ábyrgðarlausan hátt um það vandræðaástand sem skapast hefur í smábænum Gjaldeyri á Ystunöf. Þar starfa ofvirk góðgerðarfélög, Dívans klúbburinn, Lóðarís og Kvenfélagið Sverðliljurnar, og hafa þau skapað neyðarástand með stanslausum tækjagjöfum til sjúkrahúss þorpsins, í öfgakenndri baráttu þeirra um hvert félaganna er best í að vera gott. Steininn tekur úr þegar halda á upp á 100 ára afmæli sjúkrahússins og þau ákveða hvert fyrir sig að gefa, nýjasta undratæki læknavísindanna, straumlínugjafa. Læknir þorpsins reynir að sannfæra fólk um að það eina sem vanti sé hlustunarpípa en hver hlustar á svoleiðis píp þegar tækifæri til að gera góðverk af þessari stærðargráðu er annars vegar.

Leikfélag Rangæinga hefur um árabil starfað ötullega og sett upp sýningu á hverju ári. Af nýlegum sýningum má nefna Dýrin í Hálsaskógi, Orustuna á Laugalandi, Vodkakúrinn og Nýja byrjun. Oftast hafa sýningar farið fram í Njálsbúð en nú var ákveðið að breyta til og sýna í Hellubíói í samvinnu við veitingahúsið sem þar er rekið.

Miðapantanir á Góðverkin kalla! fara fram í síma 868 1188 og á netfanginu broi1970@mi.is

0 Slökkt á athugasemdum við Góðverkin kalla! í Hellubíói 443 31 október, 2013 Allar fréttir október 31, 2013

Áskrift að Vikupósti

Karfa