Ubbi kóngur sækir um að fara til Monaco 2017

Ubbi kóngur sækir um að fara til Monaco 2017

Þann 1. september sl. rann út frestur til að sækja um að fara með íslenska leiksýningu á alþjóðlegu leiklistarhátíðina í Monaco sem haldin verður í ágúst 2017. Tvær umsóknir bárust og skipaði stjórn Bandalagsins því þriggja manna valnefnd sem skilaði af sér þann 10.  september.
Niðurstaða nefndarinnar er eftirfarandi:

Valnefnd vegna alþjóðlegrar leiklistarhátíðar í Mónakó árið 2017 hefur komið saman og komist að sameiginlegri niðurstöðu. 

Tvö leikfélög sóttu um með leiksýningu á hátíðina:

Leikfélag Hafnarfjarðar með Ubba kóng.
Höfundur: Alfred Jarry
Þýðing: Steingrímur Gauti Kristinsson
Tónlist og söngtextar: Eyvindur Karlsson, Þórarinn Eldjárn og Karl Ágúst Úlfsson
Leikstjóri: Ágústa Skúladóttir.

Leikfélag Mosfellsbæjar með Mæður Íslands
Höfundar: Leikhópur, leikfélagar og leikstjóri
Leikstjóri: Agnes Wild
Tónlist: Sigrún Harðardóttir
Leikmynd og búningar: Eva Björg Harðardóttir

 Valnefnd gaf sér eftirfarandi forsendur:
1. Sýningin er innan tímamarka.
2. Sýningin hentar erlendum áhorfendum. Með því er átt við að hún sé skiljanleg fólki sem ekki skilur málið, sjónræn og byggir ekki á textaskilningi að mestu leyti. 
3. Sýningin er almennt séð góður fulltrúi íslenskrar áhugaleiklistar. 

Kemst nefndin að þeirri  niðurstöðu að mæla með Ubba kóng sem framlagi Íslands á hátíðina.  

Rök valnefndar eru þessi:
Báðar sýningar eru innan tímamarka og báðar mjög frambærilegar.

Við teljum að Mæður Íslands byggir meira á textaskilningi en Ubbi kóngur og að sýningin sé minna sjónræn. Þar hefur Ubbi kóngur vinninginn með sjónarmun. Fyrir utan að vera sjónrænni er verkið sem slíkt þekkt á alþjóðavísu.

Báðar sýningar eru mjög vel unnar og góð dæmi um metnað í  íslensku áhugaleikhúsi. 

Það að Ubbi kóngur er sjónrænni sýning með vísun í afar þekkt verk sem gefur möguleika á skilningi í alþjóðlegu samhengi. Sýningin er stór, kraftmikil og umfangsmikil þar sem sterkt verk, leikhópur, lýsing og tónlist búa til sterkar myndir til frásagnar. Þetta vegur afar þungt í niðurstöðu valnefndar.

Í valnefnd sátu: 
Guðfinna Gunnarsdóttir
Salbjörg Engilbertsdóttir
Þráinn Sigvaldason

Í framhaldinu sendir Bandalag íslenskra umsókn Leikfélag Hafnarfjarðar til Monaco, en sýningin þarf að fara í gegnum annað valferli áður en endanleg niðurstaða fæst og keppir þar við sýningar NEATA landanna sem eiga ákveðinn kvóta sýninga á hátíðinni.

Endanleg úrslit í þessu seinna vali verða kunngjörð í nóvember nk.

0 Slökkt á athugasemdum við Ubbi kóngur sækir um að fara til Monaco 2017 516 12 september, 2016 Allar fréttir, Vikupóstur september 12, 2016

Áskrift að Vikupósti

Karfa