Tom, Dick og Harry – frumsýning 30. október

Tom, Dick og Harry – frumsýning 30. október

Hjónin Tom og Linda eiga von á konu frá ættleiðingarstofunni að spjalla við þau og taka út heimilið. Bræður Tom, þeir Dick og Harry vilja ósköp vel en tekst þó að setja allt í uppnám. Smygl, ólöglegir innflytjendur og sundurlimuð lík eru ekki beint að hjálpa þegar ungt par vill ættleiða barn. Leikfélag Kópavogs frumsýnir tryllingsfarsann Tom, Dick og Harry eftir feðgana Ray og Michael Cooney í þýðingu Harðar Sigurðarsonar 30. október næstkomandi.

Ray Cooney hefur verið ókrýndur konungur farsans um áraraðir og leikrit hans þekkja allir. Með vífið í lúkunum, Úti að aka, Beint í æð og Nei, ráðherra, svo einhver séu nefnd, hafa verið sett upp um allan heim á undanförnum áratugum.
Sonur hans Michael Cooney hefur getið sér orð sem handritshöfundur í Hollywood. Hann hefur einnig spreytt sig á leikritaskrifum og er skemmst að minnast farsans Bót og betrun sem Leikfélag Kópavogs setti upp árið 2010.
Í Tom, Dick og Harry taka þeir feðgar höndum saman og útkoman er farsi af allra bestu gerð.

Níu leikarar taka þátt í sýningunni sem leikstýrt er af Herði Sigurðarsyni. María Björt Ármannsdóttir sér um leikmynd, búninga og leikmuni og Skúli Rúnar Hilmarsson lýsir.

Sýnt er í Leikhúsinu að Funalind 2. Nánari upplýsingar um sýninguna er að finna hér og hér er hægt að kaupa miða.

0 Slökkt á athugasemdum við Tom, Dick og Harry – frumsýning 30. október 100 24 október, 2018 Allar fréttir, Vikupóstur október 24, 2018

Áskrift að Vikupósti

Karfa