Skugga-Sveinn í Leikhúsinu

Skugga-Sveinn í Leikhúsinu

Leikfélag Kópavogs frumsýnir 19. október þann sígildasta af öllum sígildum, sjálfan Skugga-Svein Matthíasar Jochumssonar.  Verkið er sýnt í glænýrri leikgerð, sem löguð er að kröfum tímans.

Leikstjóri er Ágústa Skúladóttir en uppfærslur hennar á undanförnum árum hafa þótt með því ferskasta í íslensku leikhúsi,
sýningar á borð við Klaufa og kóngsdætur, Eldhús eftir máli, Stórfengleg, Grimms og margar fleiri.

Skugga-Sveinn er jafnframt vígslusýning Leikhússins sem er nýtt leikhús í Kópavogi.

Skugga-Sveinn eða Útilegumennirnir eins og það hét í upphafi er eitt þekktasta og lífseigasta verk íslenskrar leiklistarsögu. Ekkert leikrit hefur síðan notið viðlíka vinsælda hér á landi né haft önnur eins áhrif.„Menntaskólaneminn“ Matthías Jochumsson mun hafa „sullað“ saman sögunni um Skugga-Svein í jólaleyfi sínu árið 1861 og verkið var frumflutt á Gildaskálanum (þar sem hús Hjálpræðishersins stendur nú í Aðalstræti) í febrúar 1862. Hlaut það samstundis góðar viðtökur og borgaði uppihald höfundarins það sem eftir lifði vetrar að miklu leyti. Meiru varðaði þó að nú var kominn fram réttnefndur þjóðleikur – leikverk með þræði um allt miðtaugakerfi þjóðarinnar.

ss_2_250x184.pngNíu leikarar taka þátt í sýningunni og bregða sumir sér  í ótal gervi. Aðalhlutverkin eru í höndum Baldurs Ragnarssonar og Grímu Kristjánsdóttur en aðrir leikarar eru Bjarni Guðmarsson, Arnar Ingvarsson, Gísli Björn Heimisson, Sveinn Ásbjörnsson, Guðrún Sóley Sigurðardóttir, Bjarni Baldvinsson og Hörður Sigurðarson. Búningar eru í höndum Gígju Ísisar og lýsingu hannar Skúli Rúnar Hilmarsson.

Skugga-Sveinn er eins og áður sagði opnunarsýning Leikhússins í Kópavog. Leikfélag Kópavogs fékk húsið afhent á síðasta ári og síðan hafa staðið yfir framkvæmdir við að gera húsið að hentugu leikhúsi. Hér er um nokkur tímamót að ræða því í fyrsta sinn í sögu bæjarins er orðið til hús sem fyrst og fremst er ætlað til leiksýninga og leiklistariðkunar almennt. Í ljósi þessa hlutverks hússins vildu meðlimir Leikfélags Kópavogs að húsið hlyti nafn við hæfi og hefur það því einfaldlega hlotið heitið “Leikhúsið”.

Auk Skugga-Sveins verður mikið um að vera í Leikhúsinu á komandi leikári og má þar m.a. nefna að stefnt er að uppsetningu á barnaleikriti fyrir áramót og eftir áramót á að setja upp leiksýningu með unglingadeild félagsins og gamanleikrit með vorinu. Þá verður námskeiðahald af ýmsu tagi á vegum Leikfélagsins og einnig er von á gestaleiksýningum.

Leikfélag Kópavogs er opið félag áhugamanna um leiklist. Nánari upplýsingar um félagið má fá á vef félagsins www.kopleik.is og á Facebook-síðu sýningarinnar. 

0 Slökkt á athugasemdum við Skugga-Sveinn í Leikhúsinu 264 16 október, 2008 Allar fréttir október 16, 2008

Áskrift að Vikupósti

Karfa