Möguleikhúsið sýnir Aðventu

Möguleikhúsið sýnir Aðventu

Möguleikhúsið sýnir einleikinn Aðventu, sem byggður á sögu Gunnars Gunnarssonar, í Tjarnarbíói dagana 8. og 15. desember kl. 20. Í sýningunni er unnið eftir aðferðum frásagnarleikhússins þar sem einn leikari, Pétur Eggerz, stendur á sviðinu, flytur söguna og bregður sér jafnframt í hlutverk helstu persóna. Þá skipar hljóðmynd stóran sess í sýningunni og á þátt í að skapa heim sögunnar, en höfundur hljóðmyndarinnar er Kristján Guðjónsson. Leikmynd og búninga hannar Messíana Tómasdóttir.

„Þegar hátíð fer í hönd, búa menn sig undir hana, hver á sína vísu.“ Þannig hefst saga Gunnars Gunnarssonar, Aðventa. Bókin kom út árið 1939 og er hún sú saga Gunnars sem víðast og oftast hefur verið gefin út. Hún kom fyrst út á dönsku, en síðar þýddi höfundurinn hana sjálfur á íslensku.

Hér er sagt frá svaðilförum vinnumannsins Benedikts sem fer til fjalla í vetraríki aðventunnar að leita þess fjár sem eftir varð er smalað var um haustið. Það er köllun hans að koma þessum eftirlegukindum til byggða fyrir hátíðirnar. Söguna byggir höfundur á frásögnum af frægum svaðilförum Benedikts Sigurjónssonar, öðru nafni Fjalla-Bensa, á Mýrdalsöræfum og einkum þó eftirleitarferð sem hann fór í desember 1925. Þetta er klassísk saga um náungakærleika og fórnfýsi í vetrarhörkum íslenskra öræfa.

Leiksýningin Aðventa var frumsýnd árið 2008 og hefur verið sýnd víðsvegar fyrir hver jól síðan og vakið athygli.

0 Slökkt á athugasemdum við Möguleikhúsið sýnir Aðventu 266 06 desember, 2013 Allar fréttir desember 6, 2013

Áskrift að Vikupósti

Karfa