Macbeth í Þjóðleikhúsinu, miðasala hafin

Macbeth í Þjóðleikhúsinu, miðasala hafin

Jólafrumsýning Þjóðleikhússins í ár er Macbeth eftir Shakespeare í leikstjórn hins margverðlaunaða leikstjóra Benedicts Andrews. Miðasala er hafin en sýningatímabilið verður óvenju stutt, einungis verður sýnt út janúar. Margir bíða jólafrumsýningar Þjóðleikhússins með eftirvæntingu og sýningin á Macbeth verður sannkölluð hátíðarsýning. Einn af eftirsóttari leikstjórum samtímans leikstýrir Birni Thors í hlutverki Macbeths og Margréti Vilhjálmsdóttur í hlutverki lafðinnar í þessu blóðuga verki.

Að vanda er jólafrumsýning Þjóðleikhússins á annan dag jóla. Aðalæfing á verkinu verður kl. 14:00 á Þorláksmessu. Hún er öllum opin og verður miðaverð aðeins 2.000 krónur.

Um verkið:

Hið kynngimagnaða og blóðuga verk skáldjöfursins mikla, um metorðagirndina og hryllinginn sem hún getur leitt þá út í sem verða þrælar hennar. Á nýjan leik glímir hinn margverðlaunaði leikstjóri Benedict Andrews við Shakespeare á íslensku leiksviði.

Því er spáð fyrir herforingjanum Macbeth að hann eigi eftir að verða konungur Skotlands. Hvattur áfram af eiginkonu sinni myrðir hann konunginn og sest sjálfur í hásætið. En ódæðið kallar á fleiri morð. Ótti, hatur og ofsóknaræði skjóta rótum og líkin hrannast upp í kringum Macbeth. Konungshjónin feta sig sífellt lengra inn í heim vitfirringar og dauða.

Benedict Andrews hefur sett á svið fjölda verðlaunasýninga í Ástralíu og Evrópu á undanförnum árum, nú síðast stórsýninguna Stóran og smáan sem frumsýnd var í Ástralíu og hefur verið sýnd í helstu leikhúsum Evrópu. Fyrir tveimur árum leikstýrði hann hér í Þjóðleikhúsinu verki Shakespeares Lé konungi og þótti sýningin mikill viðburður í íslensku leikhúslífi. Hún var óskoraður sigurvegari á Grímuverðlaunahátíðinni 2011, hlaut sex Grímuverðlaun, meðal annars fyrir sýningu ársins og leikstjórn ársins.

Í þessari uppsetningu á Macbeth halda Benedict Andrews og leikarar Þjóðleikhússins áfram að vinna á ferskan og persónulegan hátt úr þeim stórkostlega og sígilda efnivið sem leikrit Shakespeares eru. Þórarinn Eldjárn þýðir verkið, en hann þýddi einnig Lé konung og var þýðingin tilnefnd til Íslensku þýðingarverðlaunanna.

Aðstandendur:

Höfundur: William Shakespeare. Þýðandi: Þórarinn Eldjárn. Leikstjórn: Benedict Andrews. Leikmynd: Börkur Jónsson. Búningar: Helga I. Stefánsdóttir. Lýsing: Halldór Örn Óskarsson. Tónlist: Oren Ambarchi. Aðstoðarleikstjóri: Stefán Hallur Stefánsson.

Leikarar: Björn Thors, Margrét Vilhjálmsdóttir, Arnar Jónsson, Atli Rafn Sigurðarson, Baldur Trausti Hreinsson, Björn Hlynur Haraldsson, Friðrik Friðriksson, Hilmir Jensson, Jóhannes Haukur Jóhannesson, Ólafía Hrönn Jónsdóttir, Pálmi Gestsson, Snorri Engilbertsson, Vigdís Hrefna Pálsdóttir, Þorsteinn Bachmann, Þórunn Arna Kristjánsdóttir, Ævar Þór Benediktsson og fleiri.

Frumsýning á Stóra sviðinu 26. desember.

Námskeið í samstarfi við Endurmenntun HÍ:
Þjóðleikhúsið og Endurmenntun HÍ standa fyrir námskeiði í nóvember og desember í tengslum við sýninguna. Nánari upplýsingar á endurmenntun.is.

0 Slökkt á athugasemdum við Macbeth í Þjóðleikhúsinu, miðasala hafin 311 22 nóvember, 2012 Allar fréttir nóvember 22, 2012

Áskrift að Vikupósti

Karfa