Lilli og Mikki flytja á Þingeyri

Lilli og Mikki flytja á Þingeyri

Leikdeild Höfrungs á Þingeyri hefur vakið athygli síðustu ár fyrir sérlega vandaðar og ævintýralegar fjölskyldu leiksýningar. Fyrst var það hin óborganlega Lína Langsokkur þar á eftir Galdrakarlinn í Oz og í fyrra var það hinn dásamlegi Kardemommubær eftir Thorbjörn Egner. Enn leitar leikdeildin í sjóð Egners því nú á að taka hitt leikritið og færa á fjalirnar. Nefnilega Dýrin í Hálsaskógi.

Sérstakur kynningarfundur um þessa stóru og miklu uppfærslu er laugardaginn 25. febrúar kl. 13.01 í Stefánsbúð á Þingeyri. Allir eru velkomnir hvort heldur sem fólk vill leika, smíða, sauma, mála eða bara forvitnast um verkefnið. Í framhaldinu hefjast svo æfingar sem standa yfir næstu vikurnar.

Leikstjóri er Elfar Logi Hannesson sem hefur leikstýrt öllum uppfærslum leikdeildarinnar. Frumsýning verður föstudaginn 7. apríl í Félagsheimilinu á Þingeyri sem gárungarnir eru farnir að kalla miðstöð leiklistar á Vestfjörðum.  Fleiri sýningar verða þá helgi og svo að sjálfsögðu alla páskana.

Meðfylgjandi mynd er í sýningu Leikdeildar Höfrungs á Kardemommubænum.

2 Slökkt á athugasemdum við Lilli og Mikki flytja á Þingeyri 921 17 febrúar, 2017 Allar fréttir, Vikupóstur febrúar 17, 2017

Áskrift að Vikupósti

Karfa