Harmsaga á svið í Kennedy Center

Harmsaga á svið í Kennedy Center

Sýning Þjóðleikhússins á Harmsögu eftir Mikael Torfason verður sýnd í Kennedy Center helgina 15. og 16. mars. Sýningin var valin til að taka þátt í stórri alþjóðlegri leiklistarhátíð, World Stages. Viðburðir á hátíðinni koma frá 20 löndum, en meðal þeirra sem taka þátt eru ýmsir af fremstu leikhúslistamönnum heims. Má þar nefna leikstjórann Peter Brook, leikskáldin Ariel Dorfman og David Williamson, og the Handspring Puppet Company.

Sýningarnar á hátíðinni koma víða að, meðal annars frá Frakklandi, Ástralíu, Mexíkó, Chile, Bretlandi, Suður-Afríku, Kanada, Ísrael, Kína og Japan.

Harmsaga var frumsýnd í Þjóðleikhúsinu í september s.l. í leikstjórn Unu Þorleifsdóttur en verkið var jafnframt hennar fyrsta leikstjórnarverkefni við leikhúsið.  Leikmynda- og búningahöfundur er Eva Signý Berger, tónlistin er eftir John Grant, Kristinn Gauti Einarsson hannaði hljóðmynd og Magnús Arnar Sigurðarson hannaði lýsingu.

Verkið hefur verið þýtt á ensku og munu leikararnir í sýningunni, þau Elma Stefanía Ágústsdóttir og Snorri Engilbertsson, leika verkið á ensku í Kennedy Center. Harmsaga var sýnd í Kassanum í Þjóðleikhúsinu en verður sýnd í mun stærri sal á hátíðinni, eða sal sem tekur 500 áhorfendur. Leikhópurinn og leikstjórinn munu ásamt tæknifólki og leikhússtjóra Þjóðleikhússins halda til Washington í næstu viku.

Heimasíða World Stages: http://www.kennedy-center.org/programs/festivals/13-14/world/

0 Slökkt á athugasemdum við Harmsaga á svið í Kennedy Center 357 10 mars, 2014 Allar fréttir mars 10, 2014

Áskrift að Vikupósti

Karfa