Bláskjár aftur á svið í Borgarleikhúsinu

Bláskjár aftur á svið í Borgarleikhúsinu

Bláskjár eftir Tyrfing Tyrfingsson er íslenskt gamandrama, með súrum keim, og fjallar um einlæga löngun tveggja systkina í Kópavogi (skammt frá Hamraborg) til að endurnýta sig og byrja lífið upp á nýtt. Reyndar fjallar það um sitthvað fleira, til dæmis feðraveldið, grimmdina, ofbeldið og veikburða getu okkar til þess að segja hvert öðru satt – og svo auðvitað Bláskjá og sígaunana.

 

Pabbi er loksins dauður. Systkinin Valter og Ella ætla sér flytja upp úr kjallaranum þar sem þau hafa kúldrast árum saman, en á efri hæðum hússins bjó faðir þeirra og upphaldsbarnið Eiríkur. Þau binda miklar vonir við flutningana því nú ættu draumar þeirra systkina um frægðarferil á sviði skvísubóka og ástarsamband við leigubílstjóra að geta ræst. En fyrst þarf að koma pabba gamla í gröfina og losa sig við uppáhaldsbarnið, helst fyrir fullt og allt. Valter og Ella eru fyrst og fremst Íslendingar sem mala um breytingar og betri tíð og reyna að endurnýta sig eftir undarlegustu leiðum.

Tyrfingur Tyrfingsson (f. 1987) hefur fengist við leiklist svo lengi sem hann man eftir sér og hefur þar til 2012  fyrst og fremst einbeitt sér að performans listum. Hann nam „fræði og framkvæmd“ við leiklistardeild Listaháskóla Íslands og lauk þaðan BA-prófi vorið 2011, en stundaði síðan nám í leikritun við Goldsmiths, University of London. Á síðasta leikári sýndi Borgarleikhúsið leikrit Tyrfings, Skúrinn á sléttunni, einn þriggja einþáttunga ungra leikskálda í sýningunni NÚNA! Fyrir verk sín hlaut Tyrfingur tvöfalda tilnefningu til Grímunnar, íslensku sviðlistaverðlaunanna vorið 2013. Bláskjár er fyrsta leikrit hans í fullri lengd. Verkið er tilnefnt til Grímunnar 2014 sem leikverk ársins og fyrir leikstjórn.

Höfundur: Tyrfingur Tyrfingsson
Leikstjóri: Vignir Rafn Valþórsson
Leikarar: Arndís Hrönn Egilsdóttir, Arnmundur Ernst B. Björnsson og Hjörtur Jóhann Jónsson
Leikmynd: Brynja Björnsdóttir
Búningar: Brynja Björnsdóttir
Lýsing: Garðar Borgþórsson
Hljóð: Garðar Borgþórsson
Tónlist: Högni Egilsson
Aðstoðarleikstjóri: Pétur Ármannsson
Aðstoðarkona leikstjóra: Viktoría Blöndal
Tungumál: íslenska
Tími: Fimmtudagur 28. ágúst kl. 21:00 og sunnudagur 31. ágúst kl. 16:00
Staður: Borgarleikhúsið, litla svið
Lengd: 1,5 klst
Samstarfsverkefni Borgarleikhússins og Óskabarna ógæfunnar

Sýningin er hluti af leiklistarhátíðinni Lókal

0 Slökkt á athugasemdum við Bláskjár aftur á svið í Borgarleikhúsinu 347 27 ágúst, 2014 Allar fréttir ágúst 27, 2014

Áskrift að Vikupósti

Karfa