Afmælisveislan frumsýnd í Þjóðleikhúsinu

Afmælisveislan frumsýnd í Þjóðleikhúsinu

Afmælisveislan, eitt allra skemmtilegasta leikrit Nóbelsskáldsins Harolds Pinters, verður frumsýnd í Þjóðleikhúsinu nk. föstudag, 27. apríl. Verkið er nú frumflutt á sviði íslensks atvinnuleikhúss, í nýrri þýðingu Braga Ólafssonar. Leikstjóri sýningarinnar er Guðjón Pedersen. Afmælisveislan er fyrsta leikrit Harolds Pinters (1930-2008) í fullri lengd. Það var frumflutt árið 1958 og þykir tímamótaverk í leiklistarsögunni. Fyrstu leikverkum Pinters hefur verið lýst sem “gamanleikjum ógnarinnar” en verk hans einkennast af afar frumlegum og óvægnum húmor.

Stanley er fremur framtakslaus ungur maður, sem virðist áður hafa unnið fyrir sér sem píanóleikari. Hann lifir þó á vissan hátt við ákveðið öryggi þar sem hann býr í herbergi í niðurníddu gistihúsi í litlum bæ við sjávarsíðuna í Bretlandi, dekraður af eiginkonu gistihúseigandans. Skyndilega er honum kippt af afli út úr þessari veröld, þegar tveir dularfullir menn birtast til að „refsa“ honum fyrir glæpi sem óljóst er hverjir eiginlega eru. Eiginkona gistihúseigandans vill áköf halda afmælisveislu fyrir Stanley, en veislan breytist smám saman í sannkallaða martröð…

Með hlutverk Stanleys fer Ingvar E. Sigurðsson en aðrir leikarar í sýningunni eru Kristbjörg Kjeld, Erlingur Gíslason, Eggert Þorleifsson, Björn Thors og Þórunn Arna Kristjánsdóttir. Leikstjóri sýningarinnar er sem fyrr segir Guðjón Pedersen, höfundur leikmyndar er Gretar Reynisson og búningahöfundur er Helga I. Stefánsdóttir. Ólafur Ágúst Stefánsson sér um lýsingu og Kristinn Gauti Einarsson um hljóðmynd. Aðstoðarleikstjóri er Stefán Hallur Stefánsson. Þýðinguna gerði Bragi Ólafsson.

{mos_fb_discuss:2}

0 Slökkt á athugasemdum við Afmælisveislan frumsýnd í Þjóðleikhúsinu 215 23 apríl, 2012 Allar fréttir apríl 23, 2012

Áskrift að Vikupósti

Karfa