Miðvikudaginn 25. apríl sýnir Leikfélag Mosfellssveitar síðustu sýningu sína á leikritinu Andlát við jarðarför en það er byggt á bresku kvikmyndinni Death at a funeral eftir Dean Craig. Leikstjóri er Guðný María Jónsdóttir og vann hún handrit verksins ásamt Maríu Guðmundsdóttur. Sýningin hefst klukkan 20.00.
Leikritið fjallar um fjölskyldu sem hittist í jarðarför fjölskylduföðurins. Eldri bróðirinn, sem enn býr hjá foreldrum sínum ásamt konu sinni, tekur að sér að skipuleggja jarðarförina og flytja minningarorðin. Það sem upphaflega virtist vera tiltölulega einfalt verkefni verður honum hins vegar fjötur um fót þegar alls kyns óvæntar uppákomur gera jarðarförina að algjörri matröð. Ofskynjunarlyf, óþolandi gömul frænka, hrokafullur bróðir og kvennabósi, tuðandi eiginkona og svo dularfullur gestur úr fortíð föður hans sem reynir að afhjúpa hneykslandi leyndarmál hins látna.
Miðaverð er 2000 krónur og miðapantanir eru í síma 566 7788.
