Leikskáld framtíðarinnar áttu sviðið síðasta laugardagskvöld þegar úrslit hinnar árlegu örleikritasamkeppni Þjóðleikhússins og Listaháskóla Íslands fyrir framhaldsskólanema fór fram. Fimm verk voru valin til þátttöku í úrslitunum en fjöldi örleikrita barst vítt og breitt af landinu. Leiklistarnemar á öðru ári í LHÍ fluttu verkin með tilþrifum en leikskáldin sem komust í úrslit voru Árni Arason, Guðrún Sóley Sigurðardóttir, Adam Hoffritz, Ingi Vífill Guðmundsson og Guðmunda Ólafsdóttir.
Sigurvegari keppninnar var Guðmunda Ólafsdóttir sem hlaut fyrstu verðlaun fyrir verk sitt Svartur hattur. Í öðru sæti var Guðrún Sóley Sigurðardóttir en þess má geta að hún sigraði keppnina í fyrra og hlaut þá einnig sérstök verðlaun áhorfenda líkt og í ár. Verk Guðrúnar heitir Afsakið er þessi stóll upptekinn? Þriðju verðlaun hlaut síðan Árni Arason fyrir örleikritið Gáfnafar í hættu. Verðlaunahafarnir hlutu peningaverðlaun en allir þátttakendur fengu ennfremur viðukenningarskjal og gjafakort í Þjóðleikhúsið.
Dómnefnd kvöldsins skipuðu leikskáldið Ólafur Haukur Símonarson, Ragnheiður Skúladóttir deildarforseti Leiklistardeildar LHÍ og Snæbjörg Sigurgeirsdóttir raddkennari við LHÍ.
{mos_fb_discuss:2}
