Kómedíuleikhúsið, atvinnuleikhús Vestfjarða, hefur sannarlega vakið athygli fyrir að fara sínar eigin leiðir. Eitt árið sýndi leikhúsið vestfirska verðlaunaleikinn Gísla Súrsson í sólarhring. Nú er enn eitt kómíska ævintýrið í loftinu. Því Kómedíuleikhúsið ætlar að sýna þrjá einleiki sama kveldið og ekki nóg með það heldur er sami leikari í þeim öllum. Sýningarstaðurinn er Félagsheimilið í Bolungarvík og sýnt verður föstudaginn 4. mars. Sýndir verða þrír einleikir sem eiga það eitt sameiginlegt að allir fjalla þeir um útlaga. Við erum ekki að tala um bara einhverja útlaga heldur þá þekktustu í Íslandssögunni. Það er ekkert öðruvísi.
Verkin þrjú sem sýnd verða í Bolungarvík 4. mars eru verðlaunleikurinn Gísli Súrsson, Grettir og loks Fjalla-Eyvindur. Leikari í öllum þremur verkunum er Elfar Logi Hannesson. Stutt hlé verður gert á milli leikjanna og víst er að þetta verður varla endurtekið. Svo rétt er að hvetja áhugasama til að bóka miða strax á þrefalda leiksýningu Kómedíuleikhússins í Bolungarvík.
Miðasala er þegar hafin í síma: 690 2303.
