{"id":39729,"date":"2024-02-20T11:46:59","date_gmt":"2024-02-20T11:46:59","guid":{"rendered":"https:\/\/leiklist.is\/?p=39729"},"modified":"2024-03-12T11:24:58","modified_gmt":"2024-03-12T11:24:58","slug":"leiklistarskoli-bil-2024","status":"publish","type":"post","link":"https:\/\/leiklist.is\/en\/leiklistarskoli-bil-2024\/","title":{"rendered":"Leiklistarsk\u00f3li B\u00cdL 2024"},"content":{"rendered":"

STARFST\u00cdMI SK\u00d3LANS ER 15. \u2013 23. J\u00daN\u00cd 2024 A\u00d0 REYKJASK\u00d3LA \u00cd HR\u00daTAFIR\u00d0I.<\/strong><\/h4>\n

— Smella h\u00e9r til a\u00f0 s\u00e6kja um!<\/a>*<\/span><\/strong> — \u00a0<\/strong><\/h3>\n

(<\/span>*<\/span>Opna\u00f0 fyrir skr\u00e1ningu 1. mars kl. 12.00)<\/em><\/p>\n

 <\/p>\n

\n

KVE\u00d0JA FR\u00c1 SK\u00d3LANEFND<\/h3>\n

\"\"<\/p>\n

K\u00e6ru leiklistarvinir!<\/strong><\/p>\n

\u00dea\u00f0 er okkur s\u00f6nn \u00e1n\u00e6gja a\u00f0 bj\u00f3\u00f0a ykkur velkomin \u00ed Reykjask\u00f3la \u00ed sumar \u00fear sem leiklistarsk\u00f3linn okkar ver\u00f0ur settur \u00ed tuttugasta og sj\u00f6unda sinn. Sk\u00f3linn bl\u00f3mstrar sem aldrei fyrr og vi\u00f0 sj\u00e1um fram \u00e1 mikla sk\u00f6pun, metna\u00f0 og gle\u00f0i \u00ed sumar.
\nA\u00f0 \u00feessu sinni ver\u00f0a fj\u00f6gur fj\u00f6lbreytt n\u00e1mskei\u00f0 \u00ed bo\u00f0i: \u00c1g\u00fasta Sk\u00falad\u00f3ttir<\/strong> m\u00e6tir a\u00f0 n\u00fdju og n\u00fa me\u00f0 Leiklist I, n\u00e1mskei\u00f0 fyrir n\u00fdli\u00f0a og styttra komna. Karl \u00c1g\u00fast \u00dalfsson<\/strong> mun endurn\u00fdja kynni s\u00edn vi\u00f0 sk\u00f3lann og kenna Leikritun I, fyrir \u00fe\u00e1 sem eru a\u00f0 byrja a\u00f0 koma hugmyndum \u00e1 bla\u00f0 og \u00fe\u00e1 sem vilja endurn\u00fdja kynnin vi\u00f0 grunninn. Jenn\u00fd L\u00e1ra Arn\u00f3rsd\u00f3ttir<\/strong> kemur til okkar aftur og kennir Leikstj\u00f3rn IV sem er fj\u00f3r\u00f0i \u00e1fangi \u00ed framhaldsser\u00edu hennar og systur hennar V\u00f6lu Fannell \u00ed leikstj\u00f3rn sem h\u00f3fst 2021. A\u00f0 \u00feessu sinni ver\u00f0ur meiri \u00e1hersla l\u00f6g\u00f0 \u00e1 vinnu \u00e1 g\u00f3lfi me\u00f0 leikurum. R\u00fanar Gu\u00f0brandsson<\/strong> m\u00e6tir aftur eftir nokkurt hl\u00e9 me\u00f0 S\u00e9rn\u00e1mskei\u00f0 fyrir leikara, \u00fear sem hlaupi\u00f0 ver\u00f0ur um v\u00ed\u00f0\u00e1ttur leiksvi\u00f0sins og snert \u00e1 \u00fdmsum leikst\u00edlum. \u00de\u00e1 bj\u00f3\u00f0um vi\u00f0 4 h\u00f6fundum \u00ed heims\u00f3kn til a\u00f0 skerpa st\u00edl- e\u00f0a h\u00f6nnunarvopni\u00f0! Vi\u00f0 vonum a\u00f0 sem flestir eigi \u00feess kost a\u00f0 koma, nema og nj\u00f3ta.<\/p>\n

Hl\u00f6kkum til a\u00f0 sj\u00e1 ykkur \u2013 me\u00f0 bestu kve\u00f0ju,
\nElli, J\u00f3nhei\u00f0ur, Hrefna, G\u00edsli Bj\u00f6rn og Gu\u00f0finna<\/strong><\/p>\n

\n

LEIKLIST I<\/strong>
\nKennari: \u00c1g\u00fasta Sk\u00falad\u00f3ttir
\nN\u00e1mskei\u00f0sgjald: 113.000 kr.<\/p>\n

N\u00e1mskei\u00f0i\u00f0 er grunnn\u00e1mskei\u00f0 fyrir leikara og \u00feeir ganga fyrir sem ekki hafa s\u00f3tt Leiklist I. N\u00e6sta sumar ver\u00f0ur haldi\u00f0 framhaldsn\u00e1mskei\u00f0 sem byggir \u00e1 \u00feessu n\u00e1mskei\u00f0i.<\/b><\/p>\n

\u00c1 n\u00e1mskei\u00f0inu ver\u00f0ur fari\u00f0 \u00ed grunnatri\u00f0i \u00ed list leikarans. L\u00f6g\u00f0 ver\u00f0ur \u00e1hersla \u00e1 a\u00f0 leysa \u00far vi\u00f0jum frumorku, einl\u00e6gni og sk\u00f6punargle\u00f0i, samband leikarans vi\u00f0 sj\u00e1lfan sig, me\u00f0leikara og \u00e1horfendur. Unni\u00f0 ver\u00f0ur me\u00f0 l\u00edkamsbeitingu og texta og einnig ver\u00f0ur k\u00edkt \u00e1 mismunandi leika\u00f0fer\u00f0ir e\u00f0a leikst\u00edla eins og t.d. gle\u00f0ileik, dramat\u00edk, Bouffon og mel\u00f3drama..
\nNemendur munu takast \u00e1 vi\u00f0 agann sem \u00fearf a\u00f0 vera til sta\u00f0ar \u00ed st\u00f3rum, st\u00edlf\u00e6r\u00f0um h\u00f3psenum en einnig ver\u00f0ur fari\u00f0 \u00ed spuna \u00ed sm\u00e6rri h\u00f3pum, tv\u00edleik og stuttum einleikjum. Mikilv\u00e6gi li\u00f0sheildar h\u00f3ps ver\u00f0ur r\u00edkjandi \u00fe\u00e1ttur n\u00e1mskei\u00f0sins \u00fev\u00ed \u00feegar hlustun og leikgle\u00f0i r\u00e1\u00f0a r\u00edkjum getur allt gerst!
\nMott\u00f3 n\u00e1mskei\u00f0sins: Einn fyrir alla \u2013 allir fyrir einn!!<\/p>\n

\"\"<\/strong><\/p>\n

\u00c1g\u00fasta Sk\u00falad\u00f3ttir<\/strong> er einn reyndasti leikstj\u00f3ri landsins. Leikstj\u00f3rnarverkefni hennar me\u00f0 atvinnu- og \u00e1hugaf\u00f3lki eru or\u00f0in um \u00fea\u00f0 bil 70 talsins \u00e1 undanf\u00f6rnum 20 \u00e1rum og spanna allt fr\u00e1 litlum br\u00fa\u00f0us\u00fdningum upp \u00ed st\u00f3rar \u00f3perur, fr\u00e1 einleikjum til gr\u00edmus\u00fdninga \u00e1n or\u00f0a og mannmargra s\u00f6ngleikja. Sem leikstj\u00f3ri hefur h\u00fan einnig unni\u00f0 fj\u00f6lda leiksmi\u00f0juverka, \u00fear sem s\u00fdning ver\u00f0ur til \u00far grunnhugmynd \u00ed samvinnu leikh\u00f3ps og listr\u00e6nna stj\u00f3rnenda. \u00cd \u00fev\u00ed sambandi m\u00e1 nefna Grimms me\u00f0 Leikf\u00e9lagi K\u00f3pavogs, Klaufa og k\u00f3ngsd\u00e6tur \u00ed \u00dej\u00f3\u00f0leikh\u00fasinu, \u00c6vint\u00fdri Munch\u00e1sens \u00ed Gaflaraleikh\u00fasinu og Gosa \u2013 \u00e6vint\u00fdri sp\u00fdtustr\u00e1ks \u00ed Borgarleikh\u00fasinu. \u00c1 s\u00ed\u00f0ustu \u00e1rum hefur \u00c1g\u00fasta sett upp s\u00fdningar eins og Kardemommub\u00e6inn \u00ed \u00dej\u00f3\u00f0leikh\u00fasi, Nj\u00e1lu \u00e1 hundava\u00f0i \u00ed Borgarleikh\u00fasi, B\u00edddu bara \u00ed Gaflaraleikh\u00fasinu, heilgr\u00edmus\u00fdninguna Hetju! og kve\u00f0jus\u00fdningu Karls \u00c1g\u00fasts F\u00edfli\u00f0 Tjarnarb\u00ed\u00f3i. H\u00fan er einnig leikstj\u00f3ri uppistandss\u00fdningarinnar Madame Tourette og Hva\u00f0 sem \u00fei\u00f0 vilji\u00f0 eftir Shakespeare \u00ed \u00dej\u00f3\u00f0leikh\u00fasinu, Gilitrutt me\u00f0 leikh\u00f3pnum Lottu og Hollv\u00e6ttir \u00e1 hei\u00f0inni sem s\u00fdnt var \u00ed Sl\u00e1turh\u00fasinu \u00e1 Egilsst\u00f6\u00f0um.<\/p>\n

 <\/p>\n

 <\/p>\n

\n

\"\"LEIKRITUN I<\/strong>
\nKennari: Karl \u00c1g\u00fast \u00dalfsson
\nN\u00e1mskei\u00f0sgjald: 113.000 kr.<\/p>\n

N\u00e1mskei\u00f0i\u00f0 er \u00e6tla\u00f0 \u00f6llum sem \u00e1huga hafa \u00e1 a\u00f0 spreyta sig vi\u00f0 leiktextasm\u00ed\u00f0, jafnt algerum byrjendum og \u00feeim sem einhverja reynslu hafa.<\/b><\/p>\n

Kynntir ver\u00f0a helstu \u00fe\u00e6ttir klass\u00edskrar leikbyggingar og d\u00e6mi sko\u00f0u\u00f0. Sk\u00f6punarferli\u00f0 ver\u00f0ur \u00ed brennidepli og huga\u00f0 a\u00f0 \u00fev\u00ed hva\u00f0 hvetur sk\u00f6punina og hva\u00f0 letur hana.
\n\u00cd gegnum nokkrar \u00e6fngar sko\u00f0um vi\u00f0 grunneiningar leikritsins \u2013 upphaf, mi\u00f0ju og endi, kynnum okkur pers\u00f3nusk\u00f6pun, s\u00f6gu\u00fer\u00e1\u00f0 og samt\u00f6l.
\nUnni\u00f0 ver\u00f0ur me\u00f0 stutt verk, sem \u00fe\u00f3 uppfylla \u00f6ll skilyr\u00f0i leiks\u00f6gunnar, og stefnt er a\u00f0 \u00fev\u00ed a\u00f0 lokaverkefni hvers nemanda ver\u00f0i tilb\u00fai\u00f0 til me\u00f0h\u00f6ndlunar leikara og leikstj\u00f3ra.<\/p>\n

 <\/p>\n

Karl \u00c1g\u00fast \u00dalfsson<\/strong> hefur starfa\u00f0 sem leikari, leikstj\u00f3ri, \u00fe\u00fd\u00f0andi og h\u00f6fundur \u00ed r\u00edflega fj\u00f6rut\u00edu \u00e1r. Sem leikari er hann etv. \u00feekktastur fyrir leik sinn \u00ed L\u00edfmyndunum, en einnig \u00ed \u00feeim \u00f3teljandi \u00fe\u00e1ttum sem Spaugstofan sendi \u00fat \u00e1 R\u00daV og St\u00f6\u00f0 2, en hann var einnig handritsh\u00f6fundur \u00feeirra \u00fe\u00e1tta. Sem \u00fe\u00fd\u00f0andi hefur hann \u00fe\u00fdtt vel yfir fimmt\u00edu leikrit eftir h\u00f6funda eins og Shakespeare, Ibsen, John Ford, Tennesee Williams, Mrozek, Fassbinder og fleiri en einnig s\u00f6ngleiki eins og Galdrakarlinn \u00ed Oz, Saga \u00far vesturb\u00e6num, Rent, Kabarett og Billy Elliot. Uppsett leikverk eftir Karl eru \u00e1 milli tuttugu og \u00ferj\u00e1t\u00edu, skrifu\u00f0 fyrir svi\u00f0, \u00fatvarp og sj\u00f3nvarp en hann hefur einnig rita\u00f0 kvikmyndahandrit. Af verkum hans m\u00e1 nefna\u00a0 til d\u00e6mis \u00cd hv\u00edtu myrkri, Fagra ver\u00f6ld, \u00d6rf\u00e1 s\u00e6ti laus, Gosi, Gulleyjan, \u00d3 \u00feessi \u00fej\u00f3\u00f0, Harr\u00fd og Heimir, \u00cd skugga Sveins. Gallsteinar afa Gissa og F\u00edfli\u00f0.<\/span><\/p>\n

 <\/p>\n

 <\/p>\n

\n

\"\"<\/strong><\/p>\n

LEIKSTJ\u00d3RN IV<\/strong>
\nKennari: Jenn\u00fd L\u00e1ra Arn\u00f3rsd\u00f3ttir
\nN\u00e1mskei\u00f0sgjald: 113.000 kr.<\/p>\n

Forkr\u00f6fur: \u00deeir ganga fyrir sem s\u00f3tt hafa Leikstj\u00f3rn I, II og III. Ums\u00e6kjendur me\u00f0 leikstj\u00f3rnarreynslu koma til greina ef laus pl\u00e1ss eru.<\/strong><\/p>\n

\u00c1 n\u00e1mskei\u00f0inu f\u00e1 leikstj\u00f3rar t\u00e6kif\u00e6ri til a\u00f0 vinna me\u00f0 allt sem \u00feeir hafa l\u00e6rt \u00e1 fyrri n\u00e1mskei\u00f0um. Nemendur velja s\u00e9r stuttverk e\u00f0a senu a\u00f0 eigin vali og n\u00fdta allt sem \u00feau hafa l\u00e6rt var\u00f0andi ranns\u00f3knarvinnu, greiningu og umgj\u00f6r\u00f0 \u00ed \u00fe\u00e1 vinnu. \u00de\u00e1 er l\u00edka \u00e1hersla \u00e1 vinnu me\u00f0 leikurum \u00e1 n\u00e1mskei\u00f0inu, en nemendur \u00feurfa a\u00f0 vera tilb\u00fanir til a\u00f0 leika \u00ed \u00f6\u00f0rum verkum.\u00a0<\/span><\/p>\n

\u00c1\u00f0ur en n\u00e1mskei\u00f0i\u00f0 hefst ver\u00f0a nemendur a\u00f0 hafa vali\u00f0 s\u00e9r verk, gert ranns\u00f3knarvinnu, greiningu og hugsa\u00f0 \u00fat \u00ed umgj\u00f6r\u00f0ina. \u00de\u00e1 ver\u00f0ur b\u00fai\u00f0 a\u00f0 kasta \u00ed hlutverk innan h\u00f3psins \u00feannig a\u00f0 nemendur geti kynnt s\u00e9r \u00feau verk sem \u00feau leika \u00ed.<\/p>\n

\u00cd upphafi n\u00e1mskei\u00f0s ver\u00f0ur fari\u00f0 yfir verkin og vinnuna sem leikstj\u00f3rinn hefur n\u00fa \u00feegar gert og r\u00e6tt um \u00e1kvar\u00f0anir og listr\u00e6na s\u00fdn. \u00de\u00e1 hefjast \u00e6fingar \u00fear sem \u00e1herslan ver\u00f0ur \u00e1 vinnuna \u00e1 milli leikstj\u00f3ra og leikara, enda er \u00fea\u00f0 mikilv\u00e6gasta sambandi\u00f0 \u00ed uppf\u00e6rslunni. \u00de\u00e1 ver\u00f0ur unni\u00f0 a\u00f0 \u00fev\u00ed a\u00f0 finna styrkleika og veikleika hvers og eins og hvernig megi vinna me\u00f0 \u00fe\u00e1 eiginleika. \u00dev\u00ed er \u00feetta t\u00e6kif\u00e6ri fyrir leikstj\u00f3rann a\u00f0 kynnast sj\u00e1lfum s\u00e9r vel. Umr\u00e6\u00f0ur ver\u00f0a reglulega og mun kennari auk \u00feess gefa reglulega endurgj\u00f6f sem n\u00fdtist leikstj\u00f3ranum \u00ed sinni vinnu.<\/p>\n

Jenn\u00fd L\u00e1ra Arn\u00f3rsd\u00f3ttir<\/strong> \u00fatskrifa\u00f0ist sem leikari og leikstj\u00f3ri fr\u00e1 KADA \u00ed London \u00e1ri\u00f0 2012. Eftir heimkomu stofna\u00f0i h\u00fan leikh\u00f3pinn Artik og hefur undir honum leikst\u00fdrt s\u00fdningunum Hinn fullkomni jafningi, Elska \u2013 \u00e1stars\u00f6gur \u00deingeyinga og Skjaldmeyjar hafsins, en \u00fe\u00e6r tv\u00e6r s\u00ed\u00f0arnefndu vann h\u00fan upp \u00far vi\u00f0t\u00f6lum sem h\u00fan t\u00f3k og nota\u00f0ist svo vi\u00f0 svo kalla\u00f0a Verbatim-a\u00f0fer\u00f0 til a\u00f0 setja \u00feau saman \u00ed handrit. B\u00e6\u00f0i verkin voru sett upp \u00ed samstarfi vi\u00f0 Leikf\u00e9lag Akureyrar.<\/p>\n

\u00c1ri\u00f0 2015 fluttist Jenn\u00fd svo til Akureyrar \u00fear sem h\u00fan, \u00e1samt fleirum, stofna\u00f0i leikh\u00f3pinn Umskiptinga sem hefur hloti\u00f0 miki\u00f0 lof fyrir s\u00fdningar s\u00ednar, en h\u00f3purinn hefur fengi\u00f0 tv\u00e6r tilnefningar til Gr\u00edmunnar \u2013 \u00e1ri\u00f0 2017 sem Sproti \u00e1rsins og aftur \u00e1ri\u00f0 2019 sem Barnas\u00fdning \u00e1rsins fyrir verki\u00f0 Galdrag\u00e1ttin og \u00fej\u00f3\u00f0asagan sem gleymdist. Hausti\u00f0 2021 setti\u00a0 <\/span>h\u00f3purinn upp tvo einleiki undir nafninu \u00cd myrkri eru allir kettir gr\u00e1ir og leikst\u00fdr\u00f0i Jenn\u00fd b\u00e1\u00f0um verkunum. \u00de\u00e1 h\u00e9lt h\u00f3purinn \u00e1fram me\u00f0 annan einleikinn, L\u00edf, og s\u00fdndi hann \u00e1 Reykjavik Fringe Festival 2022 og hj\u00e1 Leikf\u00e9lagi Akureyrar sama haust. \u00de\u00e1 er h\u00fan hugmyndasmi\u00f0ur n\u00fdjasta verkefnis Umskiptinga, T\u00f6frab\u00e6kurnar, sem er ser\u00eda stuttra br\u00fa\u00f0us\u00fdninga sem eru unnar upp \u00far \u00fej\u00f3\u00f0s\u00f6gum v\u00ed\u00f0s vegar \u00far heiminum. Leikst\u00fdr\u00f0i h\u00fan fyrsta verkinu, Sagan af G\u00fdpu og framleiddi \u00fea\u00f0 n\u00e6sta, F\u00f3a og F\u00f3a Feykir\u00f3fa.<\/p>\n

Leik\u00e1ri\u00f0 2023-2024 leikst\u00fdr\u00f0i Jenn\u00fd L\u00e1ra Arn\u00f3rsd\u00f3ttir barnaverkinu Litla skr\u00edmsli\u00f0 og st\u00f3ra skr\u00edmsli\u00f0 eftir \u00c1slaugu J\u00f3nsd\u00f3ttur hj\u00e1 Leikf\u00e9lagi Akureyrar sem var s\u00fdnd 24 sinnum fyrir fullu h\u00fasi.<\/p>\n

Jenn\u00fd L\u00e1ra t\u00f3k vi\u00f0 starfi sk\u00f3lastj\u00f3ra Leiklistarsk\u00f3la Leikf\u00e9lags Akureyrar hausti\u00f0 2022 og er \u00fear a\u00f0 byggja upp faglegt n\u00e1m fyrir b\u00f6rn og ungmenni auk \u00feess sem a\u00f0 stefnt er \u00e1 a\u00f0 byggja upp fr\u00e6\u00f0slustarf fyrir Leikf\u00e9lag Akureyrar. Hausti\u00f0 2023 t\u00f3k h\u00fan vi\u00f0 kennslu \u00ed \u00e1fanganum Leikstj\u00f3rinn \u00e1 svi\u00f0slistabraut Menntask\u00f3lans \u00e1 Akureyri \u00e1samt afleysingum \u00ed \u00f6\u00f0rum svi\u00f0slista\u00e1f\u00f6ngum.<\/p>\n

Jenn\u00fd hefur \u00fear a\u00f0 auki leikst\u00fdrt verkum hj\u00e1 \u00fdmsum \u00e1hugaleikf\u00e9l\u00f6gum, skrifa\u00f0 og s\u00e9\u00f0 um framlei\u00f0slu \u00e1 \u00fdmsum svi\u00f0sverkum.<\/p>\n

\n

\"Runargud\"S\u00c9RN\u00c1MSKEI\u00d0 FYRIR LEIKARA<\/strong>
\nKennari: R\u00fanar Gu\u00f0brandsson
\nN\u00e1mskei\u00f0sgjald: 113.000 kr.<\/p>\n

S\u00e9rn\u00e1mskei\u00f0 \u00ed leiklist, \u00e6tla\u00f0 \u00feeim sem s\u00f3tt hafa Leiklist I og II og e\u00f0a samb\u00e6rileg grunnn\u00e1mskei\u00f0 e\u00f0a hafa umtalsver\u00f0a reynslu af svi\u00f0sleik.<\/b><\/span><\/p>\n

\u00c1 n\u00e1mskei\u00f0inu ver\u00f0a kynntir mismunandi leikst\u00edlar og \u00f3l\u00edkar a\u00f0fer\u00f0ir vi\u00f0 a\u00f0 greina og t\u00falka leikverk. N\u00e1mskei\u00f0i\u00f0 ver\u00f0ur a\u00f0 hluta til fr\u00e6\u00f0ilegt, en einkum \u00fe\u00f3 verklegt. \u00de\u00e1tttakendum ver\u00f0a sendar stuttar senur til a\u00f0 kynna s\u00e9r (og helst a\u00f0 l\u00e6ra utana\u00f0) \u00e1\u00f0ur en n\u00e1mskei\u00f0i\u00f0 hefst. Hver dagur hefst s\u00ed\u00f0an \u00e1 fyrirlestri, fyrirspurnum og umr\u00e6\u00f0um um tiltekinn leikst\u00edl, \u00fev\u00ed n\u00e6st ver\u00f0ur vorksjoppa\u00f0 \u00ed nokkra stund, \u00fear sem allur h\u00f3purinn vinnur saman me\u00f0 \u00e6fingar og hugmyndir tengdar vi\u00f0komandi leikst\u00edl.<\/p>\n

Seinni partinn vinnur f\u00f3lk \u00ed sm\u00e6rri h\u00f3pum og p\u00f6rum me\u00f0 \u00e1\u00f0urnefndar senur og spreytir sig \u00e1 a\u00f0 beita \u00feeim hugmyndum sem kynntar hafa veri\u00f0. \u00cd lok dagsins ver\u00f0ur svo afraksturinn sko\u00f0a\u00f0ur og r\u00e6ddur. S\u00ed\u00f0ustu dagana vinnur svo hver h\u00f3pur (p\u00f6r) eina senu \u00ed einum tilteknum st\u00edl og flytur hana a\u00f0 lokum fyrir \u00e1horfendur.<\/p>\n

\u00deeir leikst\u00edlar sem unni\u00f0 ver\u00f0ur me\u00f0: Commedia dellarte. Kerfi Stanislavskys (Stanislavskys system) og amer\u00edska met\u00f3\u00f0an (The American method, t.d. hugmyndir Lee Strassberg, Stellu Adler, Sanford Meisner). Leikst\u00edll Bertolds Brecht (Ep\u00edska leikh\u00fasi\u00f0). F\u00e1t\u00e6ka leikh\u00fasi\u00f0, (Jerzy Grotowski).\u2026 og hugsanlega eitthva\u00f0 fleira. Auk leikatri\u00f0anna munu \u00fe\u00e1tttakendur f\u00e1 lesefni til fr\u00f3\u00f0leiks og er \u00e6skilegt a\u00f0 \u00fe\u00e1tttakendur s\u00e9u l\u00e6sir \u00e1 enska tungu.<\/p>\n

R\u00fanar Gu\u00f0brandsson<\/strong> nam upphaflega leiklist \u00ed Danm\u00f6rku og starfa\u00f0i \u00fear sem leikari um \u00e1rabil, me\u00f0 \u00fdmsum leikh\u00f3pum. Frekari \u00fej\u00e1lfun hlaut hann m.a. hj\u00e1 Odin leikh\u00fasinu \u00ed Holsterbro, hj\u00e1 leikh\u00f3pi Jerzy Grotowskis \u00ed Wroclaw \u00ed P\u00f3llandi, Dario Fo \u00e1 \u00cdtal\u00edu, Jury Alschitz \u00ed Kaupmannah\u00f6fn og v\u00ed\u00f0ar, og Anatoly Vasiliev \u00ed Moskvu. R\u00fanar lauk MA og MPhil gr\u00e1\u00f0um \u00ed leiklistarfr\u00e6\u00f0um og leikstj\u00f3rn fr\u00e1 De Montfort h\u00e1sk\u00f3lanum \u00ed Leicester \u00e1 Englandi og hefur loki\u00f0 fyrri hluta doktorsn\u00e1ms \u00ed fr\u00e6\u00f0unum. Hann hefur leikst\u00fdrt fj\u00f6lda leiks\u00fdninga h\u00e9rlendis og erlendis og fengist vi\u00f0 leiklistarkennslu og \u00fej\u00e1lfun leikara v\u00ed\u00f0a \u00ed Evr\u00f3pu. R\u00fanar var fyrsti pr\u00f3fessor \u00ed leikt\u00falkun vi\u00f0 Listah\u00e1sk\u00f3la \u00cdslands. Hann hefur reki\u00f0 leiksmi\u00f0juna Lab Loka s\u00ed\u00f0an 1992, stj\u00f3rna\u00f0 \u00fej\u00e1lfun h\u00f3psins og st\u00fdrt flestum verkefnum hans h\u00e9rlendis og erlendis. \u00c1ri\u00f0 2015 stofna\u00f0i hann \u00e1samt fleirum Heimilislausa leikh\u00fasi\u00f0 ETHOS sem hefur veri\u00f0 skapandi og valdeflandi vettvangur fyrir \u00fdmsa ja\u00f0arsetta h\u00f3pa. Hann hefur auk \u00feess fengist vi\u00f0 \u00fdmis konar tilraunastarfsemi \u00e1 vettvangi kvikmynda og gj\u00f6rningalistar. \u00deetta er \u00ed sj\u00f6unda\u00a0sinn sem R\u00fanar kennir vi\u00f0 sk\u00f3lann.<\/p>\n

 <\/p>\n

\n
\n
\"\"H\u00d6FUNDUR \u00cd HEIMS\u00d3KN<\/strong><\/div>\n<\/div>\n
\n
Blundar \u00ed \u00fe\u00e9r sk\u00e1ld? Ertu me\u00f0 h\u00e1lfhanna\u00f0 leiksvi\u00f0 \u00ed m\u00f6ppu? Ertu a\u00f0 bur\u00f0ast me\u00f0 hugmynd? Dreymir \u00feig um a\u00f0 kl\u00e6\u00f0a leikara \u00ed b\u00faninga? Vantar \u00feig lausa stund til a\u00f0 lj\u00faka svi\u00f0sverkinu?<\/div>\n
Sk\u00f3linn b\u00fd\u00f0ur h\u00f6fundum \u00ed svi\u00f0slistum a\u00f0 dvelja a\u00f0 Reykjask\u00f3la vi\u00f0 skapandi skrif og n\u00fa einnig \u00ed skapandi h\u00f6nnun \u00ed svi\u00f0slistum. Vi\u00f0 teljum a\u00f0 mj\u00f6g vel hafi tekist til fyrir leikh\u00f6funda og bj\u00f3\u00f0um n\u00fa \u00ed fyrsta sinn a\u00f0ra svi\u00f0sh\u00f6funda s\u00e9rstaklega velkomna til a\u00f0 nj\u00f3ta \u00feess a\u00f0 skapa, skrifa og skemmta s\u00e9r \u00ed s\u00f6nnum leikh\u00fasanda.<\/div>\n
H\u00f6fundum stendur til bo\u00f0a gisting og f\u00e6\u00f0i me\u00f0 sama h\u00e6tti og nemendum sk\u00f3lans, \u00feeim ber a\u00f0 fara eftir reglum sk\u00f3lans um umgengni o.fl. og er a\u00f0 sj\u00e1lfs\u00f6g\u00f0u velkomi\u00f0 a\u00f0 taka \u00fe\u00e1tt \u00ed \u00f6llu sk\u00f3lastarfi utan hef\u00f0bundinna kennslustunda.<\/div>\n
Vi\u00f0 hvetjum h\u00f6funda til a\u00f0 n\u00fdta s\u00e9r \u00feetta t\u00e6kif\u00e6ri og lofum \u00fev\u00ed a\u00f0 hinn eini sanni sk\u00f3laandi ver\u00f0i einst\u00f6k uppspretta sk\u00f6punargle\u00f0i!<\/div>\n<\/div>\n

 <\/p>\n

\n

ALMENNAR UPPL\u00ddSINGAR<\/strong><\/p>\n

\"\"Skr\u00e1ning \u00ed sk\u00f3lann<\/strong> stendur yfir fr\u00e1 1. mars til og me\u00f0 15. apr\u00edl. Ums\u00f3knir skal fylla \u00fat \u00e1 Leiklistarvefnum, www.leiklist.is. Opna\u00f0 ver\u00f0ur fyrir ums\u00f3knir 1. mars. kl. 12.01<\/a>.<\/p>\n