Leikfélag ungmennafélagsins Grettis á Laugarbakka í Miðfirði frumsýndi í lok mars farsann Einn koss enn og ég segi ekki orð við Jónatan eftir Marc Camoletti í þýðingu Sigurðar Atlasonar. Leikstjóri sýningarinnar er Jóhanna Friðrika Sæmundsdóttir. Páskasýning verður laugardag fyrir páska 23. apríl í félagsheimilinu Ásbyrgi á Laugarbakka.
Farsinn fjallar um erkipiparsveininn Jónatan. Hann á þrjár konur sem allar eru flugfreyjur og vita þær ekki hver af annarri. Allt gengur þetta vel þar til flugfélögin fá nýjar, hljóðfráar þotur sem eru mikið fljótari í förum, en þá riðlast allt skipulag í lífi Jónatans. Ekki bætir úr skák að félagi Jónatans, kvennabósinn og piparsveinninn Róbert kemur í heimsókn. Þegar svo er komið þarf Jónatan meir en nokkru sinni á snilli ráðskonu sinnar að halda. Hver atburðurinn rekur annan og jafnt og þétt magnast ringulreiðin í lífi Jónatans.
Leikfélag ungmennafélagsins Grettis var endurreist árið 2004 eftir 22 ára hvíld með verkinu Frænka Charlie‘s. Árið 2008 var 80 ára afmæli ungmennafélagsins fagnað með sýningu á farsanum Jón og Hólmfríður og nú í ár þessi sýning. Þetta er fyrsta sýning ungmennafélagsins sem Jóhanna Sæmundsdóttir leikstýrir og fengu þær tvær sýningar sem hafa verið mjög góðar viðtökur áhorfenda.
Með hlutverk í farsanum fara:
Gísli Grétar Magnússon, Þórarinn Óli Rafnsson, Guðrún Hálfdánardóttir, Ingibjörg Jónsdóttir, Guðbjörg Guðmundsdóttir og Hrafnhildur Víglundsdóttir
Aðrir sem koma að sýningunni:
Förðun: Kristín Arnardóttir
Leikmynd: Ari Guðmundur Guðmundsson, Gunnlaugur Frosti Guðmundsson, Sæunn Vigdís Sigvaldadóttir og Ingibjörg Jónsdóttir
Hljóð og ljós: Páll Sigurður Björnsson
Búningar: Ingibjörg Helgadóttir
Ljósmyndun og fleira: Helga Guðrún Hinriksdóttir
Miðaverð er kr. 2.000 og fer miðasala fram við komu.
{mos_fb_discuss:2}
