Athyglisverðasta áhugaleiksýning leikársins 2015-2016

Athyglisverðasta áhugaleiksýning leikársins 2015-2016

Þjóðleikhússtjóri, Ari Matthíasson, tilkynnti um valið á hátíðakvöldverði aðalfundar Bandalags íslenskra leikfélaga á Seyðisfirði laugardaginn 7. maí sl.:

Val Þjóðleikhússins á athyglisverðustu áhugaleiksýningu leikársins hefur nú farið fram í tuttugasta og þriðja sinn. Áhugasýning ársins hefur verið kærkomið tækifæri fyrir höfuðborgarbúa að upplifa þá grósku sem einkennir starf hinna fjölmörgu sjálfstæðu leikfélaga á Íslandi.

Að þessu sinni sóttu alls sextán leikfélag um að koma til greina við valið með sautján sýningar. Hlutverk dómnefndar var ekki öfundsvert því mikil fjölbreytni og hugmyndaauðgi einkenndi sýningarnar í ár. Farsar, söngleikir, spunasýningar, erlend klassík og ný íslensk leikritun eru meðal þess sem áhugaleikfélögin hafa tekið sér fyrir hendur. Dómnefndin í ár var skipuð leikurunum Tinnu Gunnlaugsdóttur, Baldri Trausta Hreinssyni og Stefáni Halli Stefánssyni auk sýninga- og handritsdramatúrg Þjóðleikhússins Símoni Erni Birgissyni.

Hér er listi yfir þær sýningar sem komu til greina við valið í ár.

 

  1. Leikfélag Hafnarfjarðar: Ekkert að óttast. Höfundur: Höfundasmiðja Leikfélags Hafnarfjarðar. Leikstjóri: Ólafur Þórðarson
  2. Leikfélagar Norðfjarðar: Benedikt Búálfur eftir Ólaf Gunnar Guðlaugsson. Leikstjóri Guðmundur Lúðvík Þorvaldsson.
  3. Leikdeild Umf Skallagríms: Blessað barnalán eftir Kjartan Ragnarsson. Leikstjóri Gunnar Björn Guðmundsson.
  4. Leikfélag Ölfuss: Einn rjúkandi kaffibolli eftir Aðalstein Jóhansson. Leikstjóri: F. Elli Hafliðason.
  5. Hugleikur: Feigð. Höfundur og leikstjóri: Ármann Guðmundsson.
  6. Leikfélagið Óríón: Kartöfludagar eftir Leikfélagið Óríón. Leikstjóri: Ingimar Bjarni Sverrisson.
  7. Leikfélag Selfoss: Kirsuberjagarðurinn eftir Anton Tsjekhov. Leikstjóri: Rúnar Guðbrandsson.
  8. Hörgdæla: Með vífið í lúkunum eftir Ray Cooney. Leikstjóri: Margrét Sverrisdóttir/Oddur Bjarni Þorkelsson.
  9. Leikfélag Mosfelssveitar: Mæður Íslands eftir leikhópinn og listræna stjórnendur. Leikstjóri: Agnes Wild.
  10. Leikfélag Vestmannaeyja: Nei, ráðherra! eftir Ray Cooney. Leikstjóri: Stefán Benediktsson.
  11. Ungmannafélag Reykdæla: Óþarfa offarsi eftir Paul Slade Smith. Leikstjóri: Ármann Guðmudnsson.
  12. Halaleikhópurinn: Sagan af Joey og Clark úr Stræti eftir Jim Cartwright. Leikstjóri: Guðjón Sigvaldason.
  13. Freyvangsleikhúsið: Saumastofan eftir Kjartan Ragnarsson. Leikstjóri: Skúli Gautason.
  14. Leikfélag Fjallabyggðar: Síldin kemur og síldin fer eftir Iðunni og Kristínu Steinsdætur. Leikstjóri: Guðmundur Ólafsson.
  15. Leikdeild Umf. Grettis: Súperstar eftir Andrew Lloyd Webber/Tim Rice. Leikstjóri: Sigurður Líndal Þórisson.
  16. Stúdentaleikhúsið: Yfir strikið. Höfundur og leikstjóri: Ólaf S. K. Þorvaldz.
  17. Stúdentaleikhúsið: Öskufall. Höfundur og leikstjóri: Tryggvi Gunnarsson.

 

Dómnefnd hefur komist að þeirri niðurstöðu að velja að þessu sinni sem athyglisverðustu áhugaleiksýningu leikársins 2014-2015 Ekkert að óttast, sýningu Leikfélags Hafnarfjarðar.

Umsögn dómnefndar:

Sýning Leikfélags Hafnarfjarðar er bæði dæmi um frumlega leikhúslega nálgun og vel framkvæmda útfærslu. Handritið var unnið í handritasmiðju með tíu höfundum sem fengu ákveðin ramma til að þróa persónur og söguþráð. Verkið gerist í okkar samtíma og er kolsvartur gamanleikur um framhjáhald, misskilning og kynferðislega spennu. Leikararnir eru kraftmiklir, brandararnir krassandi og vinnuaðferðin frumleg og spennandi. Verkið vinnur með farsaformið á frumlegan hátt og kitlar hláturtaugarnar. Endirinn minnir á kvikmyndir Tarantino eða John Woo. Sterkur leikur og nýstárleg vinnuaðferð skilar sér í athyglisverðustu áhugasýningu leikársins 2015-2016.

0 Slökkt á athugasemdum við Athyglisverðasta áhugaleiksýning leikársins 2015-2016 1992 09 maí, 2016 Allar fréttir, Vikupóstur maí 9, 2016

Áskrift að Vikupósti

Karfa